Aaron Copland
El vala sco ina dals pli impurtants represchentants da la «moderna americana». El è naschì ils 14 da november 1900 a Brooklyn, New York e gia cun 15 onns è el s'interessà fermamain per la musica ed ha vulì daventar cumponist. Davent il 1921 ha el studegià al conservatori american a Fontainebleu e pli tard a Paris. Suenter ses temp da studi ha Copland decidì da scriver ovras cun caracter american. Sias emprimas ovras eran influenzadas ferm dal jazz lura ha el cumponì musica pli accessibla. Cun predilecziun ha il figl d'immigrants lituans cumponì musica da tribuna e musica da film. Ina da sias ovras las pli enconuschentas è bain «Fanfare for the Common Man» ch'el ha scrit il 1942 per ensemble da sturs. – Il 1945 ha el retschavì il premi Pulitzer per sia ovra «Appalachian Spring».
Copland era in bun ami da Leonard Bernstein ed ha er influenzà ses stil da cumponer, Bernstein perencunter vala sco in dals megliers dirigents per ovras da Copland. Davent ils onns 70 ha Copland dirigì dapli e cumponì pli pauc. Ils onns 80 è el vegnì malsaun e mort ils 2 da december 1990 en consequenza da Alzheimer.
Philip Glass
El è naschì ils 31 da schaner 1937 a Baltimore, Maryland e vala ensemen cun Steve Reich, Terry Riley e La Monte Young sco piunier da l'uschenumnada musica minimalistica. El ha cumponì numerusas operas (p.ex. Einstein on the Beach), 12 sinfonias, 11 concerts e diversa musica da chombra sco era musica da film. Trais da sias cumposiziuns da film èn vegnidas nominadas per in Oscar. Durant ses onns da studi dal 1952 fin il 1956 è el s'occupà intensivamain cun la tecnica da 12 tuns. Vers la fin dals onns 50 è el sa distanzià da questa musica e s'avert per la musica americana moderna moderada, denter auter pia per la musica da Aaron Copland.
L'onn 1964 è Glass vegnì en l'Europa e daventà scolar da Nadia Boulanger a Paris. Ina scolaziun che ha marcà el sco cumponist. Il 1965 ha el emprendì d'enconuscher Ravi Shankar, in cumponist da l'India e sunadur da sitar. Quest instrument e la cultura musicala da l'India ha impressiunà fitg Glass ed ha manà el ad in stil da cumponer ipnotic-repetitiv, in stil che critichers han classifitgà sco «minimal music». Philip Glass sa lascha inspirar da la litteratura, istorigia ed er da la politica. Intginas operas dad el tractan persunalitads istoricas sco per exempel Albert Einstein u Mahatma Ghandi u er Christoph Columbus.
Fin uss ha Glass survegnì divers premis ed è vegnì onurà. Il 1994 è el vegnì elegì en la American Academy of Arts ans Sciences. Il 2009 han ins numnà in asteroid «100417 Philipglass» ed il 2012 ha l'imperatur dal Giapun surdà ad el il Praemium Imperiala, quai che vala sco premi Nobel dals arts. Il 2018 ha el retschavì in premi Kennedy e quest onn vegn Glass onurà cun il BBVA Foundation Frontiers of Knowledge Award.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.