Fragliuns renumads datti en il sport, en la scena da film e da divertiment ed er en la musica. Noss protagonists dad oz èn Andres e Sol Gabetta. El violinist e dirigent, ella cellista da renum mundial. Durant l’emprima ura udis Vus la Capella Gabetta, ina da lur furmaziuns ch’els han fundà il 2010 e che preschenta musica dal baroc e da la classica tempriva. Ina da las emprimas registraziuns è il «Progetto Vivaldi» cun ovras dal cumponist venezian che ha vivì dal 1678 fin il 1741 – in dals nums impurtants da ses temp. El è stà in dals emprims cumponists che han deditgà in numer pli impurtant da concerts al cello e perquai datti er il «Progetto Vivaldi» da la Capella Gabetta cun Sol Gabetta sco solista.
Frar e sora cun passiun per la musica
Sol e ses frar Andres èn naschids en l'Argentina, durant lur uffanza han els cumenzà a sunar il cello e la violina – ed han fatg carriera mundiala. Sol è ina da las musicistas las pli dumandadas, suna cun orchesters da renum sco la Staatskapelle Dresden e quella da Berlin, ils filarmonists da Vienna ubain cun l’Orchestre National de France e l’Orchestre de Paris. Ils ultims onns ha ella survegnì divers premis per sias interpretaziuns cun instruments che derivan dal 18avel tschientaner, uschia er in violoncello da Stradivari dal 1717.
Andres Gabetta è in musicist da vaglia ed emprim violinist tar plirs orchesters, uschia tar l’Orchestre Baroque de Limonges – ed el dirigia er ses agen ensemble, Swiss Baroque Soloists.
Vus udis trais da ses concerts per violoncello ed orchester, la sonata en g-moll ed ils concerts per violoncello ed orchester da Leonardo Leo e Giovanni Benedetto Platti. Andres Gabetta dirigia la Capella Gabetta, sia sora Sol al cello è la solista.
En la segunda part preschentain nus in concert da l'orchester da chombra de Losanna cun ses dirigent Adam Fischer. Vus udis la sinfonia nr. 31 en d-dur da Wolfgang Amadeus Mozart, il concert per violoncello ed orchester nr. 1 da Camille Saint-Saëns – e da Joseph Haydn la sinfonia nr. 100, en g-dur. Militaire, Londonienne no 12.
Andres e Sol Gabetta en la rait
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.