Anonymos è in ensemble vocal ch’exista dapi il 1988. Là han intginas amaturas ed intgins amaturs da chant fundà ad Ecuvillens en il chantun Friburg in chor da giuvenils. Tranter quels amaturs era il dirigent Marc-Antoine Emery. El dirigia anc oz il chor che ha dapi là dà ina massada concerts e sa participescha adina puspè cun success a concurrenzas da chant. Il 1996 ha Anonymos edì ses emprim disc cumpact. Il 1999, a la concurrenza da l'Uniun svizra da chors, è la furmaziun vegnida quarta cun la menziun «excellent» en la categoria chor d'elita. E quest predicat accumpogna il chor dapi lura. Adina puspè cumprova el sia qualitad musicala, quai era en concerts cun preschentar ovras sco «Te Deum» da Charpentier, «Requiem» da Fauré, «Cantus Missae» da Rheinberger u il «Requiem» da Mozart. L'onn passà ha il chor preschentà l'oratori da Nadal da Camille Saint-Saëns.
Era il segund ensemble vocal exista gia dapi intgins onns. L' Ensemble Vocal Origen chanta en diversas constellaziuns, magari cun dapli chantaduras e chantadurs, magari cun damain. Tut tenor il program dal festival cultural Origen. L'ensemble vegn dirigì da Clau Scherrer e chanta sin aut nivel. Ils programs èn variants, da chant rumantsch sur chants gregorians e sacrals fin ad ovras pli grondas. Ils concerts han lieu en divers lieus sco per exempel en la tur sin il Güglia, en baselgias dal Surses, en il chastè a Riom u schizunt cun chantar en il hotel Liun a Mulegns durant ch'il bajetg vegn spustà per intgins meters.
RTR ha gia fatg pliras registraziuns cun l'Ensemble Vocal Origen. Uschia er il concert en la baselgia son Martin a Cuira il settember 2022. Era questa furmaziun giauda gronda stima per ses chant medemamain excellent.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
