L'Artg musical fa in viadi musical en las valladas talianas dal Grischun. Furmaziuns da chant e musica dal Puschlav, Val Bregaglia, Val Mesauc e Val Calanca preschentan chanzuns popularas dal Grischun. La gronda part èn melodias popularas dal Grischun talian.
La PGI (Pro Grigioni Italiano) ha deditgà l'onn 2008 a la musica ed ha vulì renconuscher l'engaschi da tuttas persunas che s'occupan cun chant e musica. Uschia è naschì il project d'in portatun sin iniziativa da la COPRA (Commissione per la promozione artistica) da la PGI. RSI (Radiotelevisione Svizzera Italiana) ha la finala realisà in album cun dus discs cumpacts cun il titel «Al sul e l'amur».
Sut la direcziun d'ina gruppa da lavur cun Raffaella Adobati Bondolfi (manadra da project, commembra COPRA), Agostino Priuli (manader da la promoziun d'art PGI), Pietro Bianchi (responsabel musica RSI), Ivan Nussio (cussegliader da musica, commember COPRA), Mirko Priuli (organisatur cultural PGI) ha il project gì l'intenziun da render enconuschent la musica ed il chant da le Valli ad in public pli vast.
L'Artg musical porta oz intginas registraziuns da quest album cun furmaziuns sco per exempel il Coro Polifonico del Moesano, il Quartetto Fiamma da la Bregaglia u I Segriséi di Soazza.
