La furmaziun è oriundamain sa sviluppada or dal Quartet Instrumental Trun. Il musicist da Trun, Corsin Tuor, ha vulì crear en il Grischun ina sort «Philip Jones Brass Ensemble», ina furmaziun che porscha ad in vast auditori musica originala per sturs sco er arranschaments adequats or dal mund da la musica profana e sacrala. Ensemen cun ils auters commembers dal quartet, Philipp Tuor, Curdin Maissen, Anton Pelican ed il dirigent Ignaz «Kiki» Schmed han els dumandà il 1989 ulteriurs musicants da hobi da fundar in nov ensemble. Quels han lura era tschertgà in num ed èn sa decidì per Cerchel Musical Sursilvan («CMS»).
Fatg part a l'eprima furmaziun han Marius Fry, Anton Pelican, Hugo Schär, Curdin Maissen (tuts cornet e trumbetta), Tumaisch Fry (corn en es), Verner Solèr (eufoni), Ignaz Schmed e Gion Lechmann (omadus posauna), Philipp Tuor (es-tuba) e Balzer Spescha a la batteria. Dirigent era Corsin Tuor. Las emprimas emprovas dal CMS èn stadas a Zignau en l'anteriura chasa da scola. Pli tard ha l'ensemble fatg las emprovas en la sala dal Hotel Greina a Rabius. Il pli han ils musicants da hobi exercità la sonda saira (18:00 - 23:00) e la dumengia avantmezdi (08:00 - 12:00).
Emprimas midadas
Suenter bun in onn hai dà roschadas e midadas. Ignaz Schmed ha cumenzà ina scolaziun (el è vegnì remplazzà cun Markus Schmid) e Verner Solèr è emigrà en ils Stadis Unids. Davent da lura ha Philipp Tuor sunà eufoni ed Armin Spescha è vegnì sin la tuba en es. Pauc pli tard hai dà in'ulteriura roschada aifer la formaziun. Tumaisch Fry ha bandunà la Surselva ed il CMS. Hugo Schär ha sinaquai midà sin corn en es ed entrà da nov è Marcel Cadalbert sin cornet e trumbetta. La percussiun è vegnida cumplettada cun Adrian Cadalbert e Jürg Gautschi cun la ghitara da bass. Cura che Ignaz Schmed ha terminà cun success sia scolaziun professiunala è el returnà en la furmaziun, betg pli sin posauna mabain sin il bariton.
Emprims success
En questa cumposiziun ha la furmaziun dà ils emprims concerts sacrals e profans en divers lieus dal Grischun. Pass per pass è il «Cerchel musical dalla Surselva» vegnì pli e pli enconuschent ed ha cun ses success creà aifer curt temp in num, ina reputaziun che ha possibilità da cooperar cun differentas furmaziuns instrumentalas e vocalas (p.ex. cun il Chor viril Surses, Compagnia Rossini). Per tut la lavur administrativa ed organisatorica ha la furmaziun gì il sustegn da Heidi Nold (secretaria) e Hans Villinger (president e manager).
Emprimas registraziuns
Suenter ch'il radio DRS (oz SRF) e Radio Rumantsch (oz RTR) han registrà emprims tocs dal CMS han ils musicists e lur dirigent gì il siemi da far in disc cumpact. Grazia als contacts da Hans Villinger cun in musicist en Belgia ha el chattà a Gent (Belgia) in studio adattà (Steurbaut e Florian Heyerinck sco manader da la registraziun) per realisar quest siemi l'onn 1993. Il viadi cun bus en la Belgia ha durà bunamain uschè ditg sco las registraziuns. Aifer trais dis ha il Cerchel musical dalla Surselva registrà 17 tocs per ses emprim disc «Moviments».
Aifer ils proxims onns hai lura dà ulteriurs portatuns:
- «Nadal» (1995)
- «Classic Rock» (1996, ensemen cun il chor «Ils Cantins»)
- «Fantasia» (1997)
- «Misteri da Nadal» (1998 ensemen cun il Cor da Baselgia da Müstair)
- «Classic Cinema» (2000 cun Nubya e Florian Schneider)
- «America» (2001, ultim disc cun Corsin Tuor sco dirigent)
- «Chicago Mountain Swing» (2004)
Il 1996 è la furmaziun vegnida onurada cun il premi da cultura da la CRR (oz SRG.R). Plinavant è Corsin Tuor vegnì onurà il 1998 dal chantun Grischun cun in premi da promoziun.
Il Cerchel musical dalla Surselva en l'archiv da RTR
L'onn 1993 ha la televisiun rumantscha era fatg registraziuns en il chasti da Haldenstein per in'emissiun d'advent. En l'emprim video suna il CMS «It's a lovely day tomorrow» cun il solist al cornet Marcel Cadalbert. Ils ulteriurs videos mussan medemamain musica per advent registradada l'onn 1997 en la baselgia Pleif a Vella e musica sacrala per l'onn nov (2000) or da la baselgia parochiala da Laax. Enpli datti anc in video da l'emissiun «Bsuech in....» a Glion nua ch'il CMS ha sunà «ses» marsch.
La fin d'october 1994 ha RTR registrà in concert dal Cerchel musical dalla Surselva a chaschun da la ILHGA (Ilanzer Handels- und Gewerbeausstellung) e cun la moderatura da RTR Maria Cadruvi.
Il 1999 ha il Cerchel musical dalla Surselva pudì festivar ses giubileum da 10 onns. Per quel ha Corsin Tuor cumponì il «CMS-March» nua ch'el ha integrà en il trio la chanzun «O cara Surselva». Da l'emprima furmaziun n'eran be anc il dirigent Corsin Tuor, il cornetist Marcel Cadalbert ed il posaunist Gion Lechmann da la partida. Ils auters han chalà or da divers motivs ed èn vegnids remplazzads cun musicists e musicistas per gronda part anc da la Surselva. Per il concert da giubileum a Sagogn èn dentant er ils anteriurs musicants vegnids envidads per collavurar. Uschia hai quasi dà ina Brass Band da giubileum ad hoc.
Suenter che Corsin Tuor ha lura era dà giu la bitgetta (l'onn 2001) ha Gion Andrea Casanova surpiglià la direcziun e paucs onns suenter Marcel Cadalbert. Novs portatuns n'hai betg pli dà ma l'ensemble ha anc dà in u l'auter concert. Pass per pass èsi vegnì pli e pli quiet enturn il CMS, per part era per mancanza da sunaduras e sunadurs. L'ultima registraziun da RTR dal Cerchel musical dalla Surselva è dal mars 2011. Grazia a quella ed era grazia als divers discs cumpacts resta il Cerchel musical dalla Surselva en memoria sco fin ussa sulet «Philip Jones Brass Ensemble» dal Grischun.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.