Siglir tar il cuntegn

Artg musical Chanzuns da Markus Fricker

Markus Fricker è da l'annada 1943 ed è da Rupperswil (AG), in lieu tranter Lenzburg ed Aarau. El ha lavurà fin la pensiun sco scolast da musica ed ha era dirigì divers chors. Dal cumponer ha el ditg laschà la detta, pertge per el eran ils cumponists ina sort heroxs, gia da buob ensi.

Tant en scola sco era tar chanzuns per ses chors hai magari dà la situaziun ch'el ha stuì arranschar in zic per pudair adattar ina chanzun a la furmaziun. Uschia ha el pass per pass survegnì adina dapli gust da scriver musica e la finala ha el cumenzà a cumponer ils onns 1990 adina pli savens.

Bim Moonschyn

La pli enconuschenta chanzun da Markus Fricker è probabel «Bim Moonschyn» cun in text da Josef Reinhart. Quella ha el scrit sin fundament d'ina melodia che ses frar ha schulà. Lura ha el però mess questa chanzun en ina chaschutta e bunamain emblidà ella. L'onn 2003 ha el inoltrà la chanzun a la concurrenza da cumposiziun a chaschun dal Festival europeic da chors da giuvenils e fatg il segund plaz. Era per la concurrenza da cumposiziun al Festival da la chanzun rumantscha (2019 e 2022) ha el inoltrà chanzuns cun texts rumantschs («Ruinaulta» ed «In surrir»). Ils ultims 30 onns ha Fricker scrit numerusas chanzuns, per gronda part a cappella.

Text è impurtanta basa

Per pudair crear novas chanzuns va Markus Fricker adina sin la tschertga da texts. Quai capita in pau dapertut, per exempel en bibliotecas, en il mund da la litteratura populara u magari era per casualitad. Sch'el frunta sin in text che fascinescha el lura sesa el vi da ses clavazin e cumenza a tschertgar melodias fin ch'el ha insatge da metter sin palpiri.

Disc cumpact

L'idea d'in disc cumpact è naschida dals administraturs da la pagina chorliteratur.ch. Rainer Held, il dirigent dal Chor viril Surses ed in bun ami da Markus Fricker è stà da l'oppiniun che quai saja da far pli «internaziunal» e professiunal. Cun agid da ses contacts en Germania han ins lura pudì realisar il disc cumpact. Il «Deutscher Kammerchor» è stà a disposiziun e sut la direcziun da Rainer Held han els registrà l'entschatta schaner dal 2023 25 chanzuns per il disc cumpact «Markus Fricker – Chormusik a cappella». Mai avess il cumponist semià ch'i dettia in di in disc cumpact cun sias chanzuns. Tant pli fitg è el cuntent cun il portatun.

RTR Artg musical 14:00

Artitgels legids il pli savens