CLAZZ – dialog tranter classica e jazz – è in'expediziun musicala che tschertga e viva il dialog tranter l'avertadada improvisatorica dal jazz ed il tun policron d'in orchester sinfonic. Il giavisch da cumponer insatge per ina furmaziun da jazz ed in orchester aveva il giuven cumponist grischun Luca Sisera (*1975) gia daditg. Durant la pausa sfurzada da corona ha el realisà ses giavisch e scrit l'ovra Clazz.
Finamira saja stà da stgaffir insatge nov ed maiudì. Ensemen cun la Kammerphilharmonie Graubünden sut la direcziun da Gaudens Bieri sa metta il quintett da jazz ROOFER sin questa excursiun musicala plain tensiun. La cumbinaziun tranter jazz e classica far era punts tranter tradiziun ed innovaziun.
Las audituras ed ils auditurs pon sa legran sin ina suita da jazz aventurusa en tschintgs parts senza avair in orizont stretg e tema da contact.
Il cumponist
Luca Sisera è naschì ils 27 d'avust 1975 a Cuira e dapi passa 20 onns in bassist e cumponist tschertgà en la scena da jazz ed improvisaziun. Cun plirs projects ha el gia survegnì attenziun internaziunala. Fin uss ha el publitgà passa 35 portatuns cun sia participaziun. El cumpona er bler per ses agen quintett da jazz (ROOFER). Per part dat el passa 100 concerts ad onn en l'entira Europa ed er sur mar.
La primaudiziun da l'ovra CLAZZ è stada ils 9 da settember 2022 a Schaan en il Prinzipadi dal Liechtenstein.
Cuntrari a l'emissiun en il radio è d'udir sin il podcast l'entira cumposiziun CLAZZ, pia inclus la part 5: Atlantic Sketches.
