Era quest onn ha la JBBG – la Brass Band da giuvenils grischuna – realisà ses champ da musica a Meierhof, Sursaissa. 41 giuvnas e giuvens da l'entir chantun Grischun èn s'inscuntradas per sunar, far musica e preparar in concert final. Las giuvnas ed ils giuvens da 13 fin 25 onns han dentant er gì temp per star da cumpognia e discutar da musica ed auters temas.
Dapi il 1988 exista la JBBG ed ha dapi lura mussà ed instruì a bleras musicantas giuvnas ed a blers musicant giuvens da far musica, da sunar in instrument da sturs. Il champ da stad è daventà in'instituziun ed emprova er en l'avegnir da mantegnair la purschida. Ina persuna ch'è bunamain dapi l'entschatta da la partida è Toni (Anton) Deplazes. Il 1991 è el per l'emprima giada sa participà sco giuven musicant e dapi lura stà senza interrupziun al camp. Suenter ils onns da musicant sco suprastant ed a la fin sco president. Quest onn remetta el ses uffizi suenter 13 onns sco president. Ses merits per la JBBG èn gronds.
Il dirigent
Quest onn è la musica stada sut la direcziun da Enrico Calzaferri (annada 1986). El è naschì e creschì si a Kirchberg, chantun Son Gagl. Sia famiglia ha però er ragischs en Surselva, a Breil. Enrico Calzaferri è eufonist, dirigent, scolast da musica ed adina puspè er expert a festas da musica. Actualmain dirigia el la Brass Band Rickenbach e dapi il schaner 2023 er la musica da Zürich-Höngg. Dapi il 2022 è el manader da partiziun da la scola da musica Oberer Sempachersee. Avant ha el manà durant 9 onns la scola da musica Michelsamt. Sper la musica sgola el gugent cun paraglischnader, savens fa el er sgols da tandem.
Il solist
Klemens Vetter n'ha betg be exercità cun il register da baritons ed eufonis al champ da la JBBG. Al concert final è el er passà si sco solist ed ha fascinà il public cun sia virtuositad e musicalitad. Il Tudestg è da l'annada 1992 ed ha studegià eufoni a la Scol'auta da Lucerna. El instruescha «ses» instrument al conservatori Peter-Cornelius a Mainz ed è dapi il 2021 incumbensà per eufoni al Leopold-Mozart-College da l'universitad da Augsburg nua ch'el instruescha la suletta classa d'eufoni en l'entira Germania.
Il concert da quest onn sco era intgins concerts da la JBBG dals ultims onns chattais era sin nossa plattafurma Playfestas.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
