Il 1997 è vegnì fundà l'ensemble d'instruments a sturs «Swiss Brass Consort» e dapi lura intganteschan ils 11 musicists professiunals svizzers il public en l'entira Europa. La furmaziun sa cumpona or da quatter trumbettas, quatter posaunas, in corn, ina tuba ed in percussiunist. Els èn solists, musicists d'orchester e musicists libers ord la musica classica ed il jazz. Actualmain sunan anc trais commembers fundaturs en l'ensemble: Lukas Christinat (corn e president), Adrian Weber (posauna) e Remo Capra (tuba). Las autras posiziuns ha l'ensemble pudì remplazzar adina puspè cun fitg buns musicants or da l'entira Svizra.
Adina puspè vegn il Swiss Brass Consort er envidà a festivals internaziunals sco per exempel Mozartfest Würzburg, Bachfestival Arnstadt, Murten Classica u il Brass Festival Meran. Fin oz ha l'ensemble publitgà set portatuns, han fatg numerusas registraziuns per radio e televisiun ed èn d'udir regularmain a concerts en ed ordaifer la Svizra.
La furmaziun da concert dal 2010:
- Trumbettas: Paul Muff, Heinz Saurer, Patrick Ottiger, Sandro Häsler
- Posaunas: Armin Bachmann, Niki Wüthrich, Adrian Weber, Markus Michel
- Corn: Lukas Christinat
- Tuba: Remo Capra
- Percussiun: Andreas Berger
