Igl è stà in concert d'orchester festiv sut il motto «Per pasch e libertad». Malgrà la guerra en lur patria han las musicistas ed ils musicists ucranais vulì mantegnair la bella tradiziun da vegnir en il Grischun e dar concert. Era l'onn 2022 ha l'orchester naziunal dà trais concerts, in a Mustér, in a Falera ed in a Vaz Sut.
Fidelio-Ouvertüre
Gist pliras ovras da concert han in connex istoric u tematic per il motto. Per Ludwig van Beethoven per exempel era si'opera Fidelio ina vaira opera da libertad, nua ch'el ha vulì mussar sin moda musicala las valurs eticas ed ils ideals da la Revoluziun franzosa e la violenza cunter il dretg. Beethoven è sa fatschentà intensivamain cun sia suletta opera. Quai cumprova era ch'el ha scrit gist quatter uverturas. Il pli savens vegn sunada quella ch'el ha scrit sco ultima, la «Fidelio-Ouvertüre».
Visions of Casanova
Sin incumbensa dal festival Menhir Falera ha la cumponista ucranaisa Victoria Poleva cumponì il «Capriccio per Gion Balzer», in’ovra per fagot ed orchester. Ella sa basa sin l’enconuschenta chanzun da Gion Balzer Casanova «La sera sper il lag». La primaudiziun dal capriccio è stada il settember 2008. Lura ha il figl da Gion Balzer, Gion Andrea, sunà il fagot. Al concert dal National Philharmonic Orchestra of Ukraine ha Andriy Tkachuk surpiglià la rolla da solist. Là ha il toc «Capriccio per Gion Balzer» survegnì in auter num, numnadamain «Visions of Casanova».
