En connex cun il project aVENTura ha l'Uniun svizra da musica fatg ina gronda enquista cun la finamira da far pli enconuschenta la litteratura da musica instrumentala svizra tant en Svizra sco er en l'exteriur. Vitiers vul ins cuntanscher che las ovras svizras vegnan sunadas pli savens.
En in'emprima enquista ha il team da project aVENTura contactà 23 persunalitads da la scena da musica d'instruments a flad svizra e supplitgà els da crear ina glista persunala da lur diesch meglras ed impurtantas ovras instrumentalas. Els han dastgà numnà pliras ovras dal medem cumponist.
En total han las 23 persunalitads uschia numnà 117 cumposiziuns da 31 differents cumponists. Las pli bleras nominaziuns (14) ha survegnì l'ovra «Transformationen» d'Albert Benz. Mintgamai indesch giadas èn vegnidas numnadas «Le premier jour» da Jean Balissat e «Audivi Media Nocte» da Oliver Waespi.
En ina segunda part da l'enquista han las persunalitads giuditgà a moda anonimisada las 117 cumposiziuns numnadas. Ellas han gì da giuditgar ellas tenor ils suandants criteris: «fitg impurtant», «impurtant», «plitost impurtant» e «betg impurtant». Ils criteris da giudicament sa basan tant sin criteris da qualitad objectivs sco er sin las preferenzas persunalas da las participantas e dals participants da l'enquista.
Evaluaziun da l'enquista
Per valitar l'impurtanza da l'ovra han ins repartì puncts. Il giudicat «fitg impurtant» ha dà 4 puncts, «impurtant» 3 puncts, «plitost impurtant» 2 puncts e «betg impurtant» 1 punct. Er relevant era il dumber da las nominaziuns ed cun quai han in quintà ora la muntada da las singulas ovras.
Exempel «Les Gursks» da Jean Balissat:
«fitg impurtant»: 9 nominaziuns – 9 x 4 puncts = 36 puncts
«impurtant»: 8 nominaziuns – 8 x 3 puncts = 24 puncts
«plitost impurtant»: 3 nominaziuns – 3 x 2 puncts = 6 puncts
«betg impurtant»: 1 nominaziun – 1 x 1 punct = 1 punct
Fa en total 67 puncts tar 21 nominaziuns. 67 / 21 = 3,19 puncts.
Sin questa moda han 62 da las 117 ovras instrumentalas cuntanschì en media almain 3 puncts («impurtant») ed èn perquai vegnidas sin la glista «Die bedeutendsten Schweizer Bläserwerke».
Litteratura da musica svizra
Il cumponist cun las pli bleras ovras sin la glista è il Turitgais Oliver Waespi (18 ovras) suandà da Jean Balissat e Stephan Jaeggi (mintgamai 7 ovras). Er dapli ch'ina ovra han Franco Cesarini (6), Arthur Honegger, Paul Huber e Thomas Trachsel (mintgamai 4 ovras).
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.