Johann Sebastian Bach ha cumponì per mintga dumengia e firà ina cantata, da l'emprim advent fin Pasca e vinavant fin l’ultima dumengia avant l’advent. In pèr dumengias han schizunt pliras da questas ovras, uschè ch’i dat var 200. Da tut questas è vegnida preschentada ina schelta da l'orchester Göteborg Baroque, qua in’aria, in toc instrumental e lura in choral, uschia ch’i dat in artg sur tut l’onn – da l'advent a l'advent.
Il concert è vegnì registrà ils 8 da settember da l’onn passà en la Christinae kyrka a Göteborg, ina producziun dal SER, il radio svedais. Dirigent è Magnus Kjellson che ha fundà il Göteborg Baroque il 2003. Quest orchester preschenta en emprima lingia musica dal temp dal baroc ed er ovras remartgablas emblidadas.
