La Hanneli-Musig è ina chapella extraordinaria. Però esser en gir dapi 320 onns, quai fiss in pau bler! Dapli da questa cifra vegnis Vus a savair en l’Artg musical da questa dumengia. Cumenzà ha l’istorgia da success da la Hanneli-Musig il 2002. E quest onn datti ils ultims concerts da la turnea da cumià, e tschintg anniversaris radunds da ses musicants: 80, 70, 60, 60 e 50.
Ha survegnì il 2010 la clav d’aur da violina, la distincziun la pli impurtanta da la musica populara. El è in dals gronds enconuschiders ed experts da la musica populara, ha lavurà sco redactur da musica tar radio DRS ed è cumponist, arranschader e multiinstrumentalist. Sin il palc ed en il studio è el da vesair cun clarinetta, orgelet, ghitarra, cuntrabass ed anc blers auters instruments. Ha sunà cun las chapellas«Zoge-n-am Boge», Dünner-Nauer, cun Willy Valotti, Peter Zinsli ed anc adina cun ils Engadiner Ländlerfründa.
Dani Häusler è naschì ils 30 da schaner 1974 a Zug, uss viva el a Sviz. El è in musicant da vaglia, in clarinettist excepziunal ed er sco cumponist è el apprezià da tut las varts. Dani Häusler è engaschà tar diversas furmaziuns, però er docent a la Scol’auta da musica a Lucerna e redactur da musica tar la Musikwelle da radio SRF. El suna er tar diversas furmaziuns sco ils Hujässler, la Hujgroup, la Hanneli-Musig e cun sia emprima chapella, ils Gupfbuebä ch'existan dapi il 1986.
Las ovras dal cumponist e cellist Fabian Müller, naschì 1964 a Turitg, èn vegnidas inscenadas tras gronds musicists da noss temp, sco David Zinman, Andris Nelsons u Steven Isserlis. Ed ellas èn vegnidas preschentadas en grondas salas sco la Carnegie Hall, il Teatro Colon u la Tonhalle da Turitg. El è er in enconuschider profund e promotur da la musica populara svizra. 10 onns ha el lavurà vi da l'ediziun dals sauts da la collecziun «Hanny Christen», ina antologia da diesch toms cun passa 10'000 melodias dal 19avel tschientaner.
Johannes Schmid-Kunz è musicist, manader da saut e manager da cultura. El vala sco expert e grond enconuschider da la cultura populara en Svizra. El deriva d'ina famiglia da musicants, e gia d’uffant ha el sunà cun la «Adliswiler Stubemusig». Ses dus instruments principals èn la flauta e la violina, però suna el er il cuntrabass. Johannes Schmid-Kunz è stà commember da la furmaziun «Ländlerkönige», ha sunà cun il trio «Rundum», cun il quartet «Laseyer», e cun la Hanneli-Musig.
Wolfgang Sieber suna l'orgla en moda dinamica, surprendenta e carismatica. Suenter sia epoca sco fundatur ed organist en la baselgia da St. Leodegar a Lucerna (1992–2021), cuntinuescha el sia lavur artistica sut il motto «orgla dapertut». En ils secturs da la musica classica e tradiziunala-populara è el sa participà tar var 100 producziuns da video e da discs cumpacts. Il 2014 ha er el survegnì la clav da violina d’aur.
Las ragischs èn tar Hanny Christen. Ella ha vivì dal 1899 fin il 1976 ed ha ramassà in grond stgazi da musica populara, sauts che fissan forsa ids a perder. A partir dal 1940 ha ella notà millis da melodias, ed il 1963 surdat ella sia collecziun a la biblioteca da l’Universitad da Basilea – e là è quella restada 30 onns.
Il 1992 chatta il musicant e cumponist Fabian Müller per cas il relasch da Hanny Christen. Ils 12’000 sauts vegnan sortids, cataloghisads – ed il 2002 vegn publitgada la collecziun da la chasa editura Mülirad.
Nova vita per sauts emblidads
Suenter la publicaziun è l’interess da chapellas e da furmaziuns grond. Ellas cumenzan a sunar quels sauts. La pli impurtanta è la Hanneli-Musig, fundada il 2002 aposta per far reviver las melodias veglias. Ils musicants da vaglia Dani Häusler, Fränggi Gehrig (fin il 2008 Markus Flückiger), Ueli Mooser, Peter Gisler (fin il 2018 Christoph Mächler), Fabian Müller e Johannes Schmid-Kunz han registrà otg discs cun sauts da tut la Svizra, han fatg tschients concerts ed han procurà ch’ils sauts da la collecziun da Hanny Christen na restian betg be en ils truclets.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
