Fritz Stüssi è naschì ils 6 d'avrigl 1874 a Huggenberg, chantun Turitg. Sia famiglia è oriunda dal chantun Glaruna. Davent il 1887 è el creschì si tar ondas a Käpfnach sper il lai da Turitg ed ha survegnì instrucziun da clavazin ed orgla. El ha frequentà il gimnasi e la scola da musica da Turitg ch'el ha terminà sco pianist e cumponist. Il 1894 ha el studegià in onn a l'institut da musica roial a Berlin, tranter auter cumposiziun tar Max Bruch, tar Reinhold Succo contrapunct e clavazin tar Ernst Rudorff. In onn pli tard è Stüssi returnà a Turitg ed ha surpiglià la direcziun da plirs chors ed orchesters da la regiun.
«Retg da musica»
Suenter sia maridaglia cun Hanna Pfenninger èn els sa domiciliads a Wädenswil. El han survegnì tschintg uffants, tranter quests l'inschignier e rectur da la ETH Turitz Fritz Stüssi. Il 1902 è el daventà organist da Wädenswil ed ha era marcà la vita musicala enturn sies domicil. Il 1914 è stada la primaudiziun da ses oratori «Vergehen und Auferstehung» ed il 1921 il «Psalm 28». Tranter il 1898 ed il 1912 ha el tranter auter dirigì chors ed orchesters da Uster, Männedorf, Rapperswil, Lachen, Richterswil, Thalwil e Turitg ed era uschia ina sort «retg da musica» enturn il lai da Turitg.
Sias cumposiziuns èn en la tradiziun da la romantica tardiva ed èn inspiradas puncto expressiun e dramatica fermamain da la musica da Richard Wagner, han dentant er ina relaziun tar la musica da Robert Schumann, Felix Mendelssohn-Bartholdy e Johann Sebastian Bach. Sco pli impurtanta ovra vala ses oratori sacral «Vergehen und Auferstehung» per soli, chor, chor da mats ed orchester grond.
Mort anetga
Ses grond engaschi da lavur ha flaivlentà sia sanadad. Il 1922 ha el survegnì la diagnosa diabetes a tar ina cura a Degersheim è el mort nunspetgadamain ils 14 da mars 1923. Fritz Stüssi ha laschà enavos radund 130 cumposiziuns, tranter auter sis ovras per orchester, dus oratoris sco er diversas cantatas, motettas e chanzuns. Il material da notas original ha ses figl Fritz magasinà tar el privat ed in biadi dal cumponist (Hans Kaspar Schulthess) ha lura surdà quai material a la biblioteca centrala da Turitg.
In auter biadi, Ulrich Stüssi, ha uss, suenter 100 onns, puspè fatg enconuschent l'ovra da ses tat Fritz Stüssi. Il 2011 ha el fundà L'orchester Kammerphilharmonie Zürich che fa per regla quatter projects ad onn. El sa cumpona da radund 60 musicistas e musicists da professiun cun ina vegliadetgna media da 29 onns. Ils concerts vegnan dads en emprima lingia en la regiun da Turitg sco era en l'entira Svizra e cuntegnan adina almain in'ovra da Fritz Stüssi.
L'atun 2023 è cumparì il disc cumpact «A Swiss Romantic» da la Zürcher Singakademie e ses dirigent Florian Helgath e la Kammerphilharmonie Zürich.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.