Siglir tar il cuntegn

Header

audio
Giats en la musica instrumentala
Or da Artg musical dals 19.03.2023. Maletg: Keystone
laschar ir. Durada: 1 minuta 2 Secundas.
cuntegn

Artg musical Giats en la musica instrumentala

Na, l'Artg musical na porta nagina musica da giats, mabain cumposiziuns deditgadas a giats. Divers cumponists da musica instrumentala s'han laschà inspirar da l'animal da chasa ed han scrit ovras curtas e divertentas, però er sensiblas che caracteriseschan per part lur agens giats.

Il cumponist britannic Chris Hazel aveva per exempel dà suttetg a divers giats senza possessur. Intgins da quels ha el descrit musicalmain lur caracters. Lur nums «Kraken», «Borage» u «Mr. Jums» han dà il titel da las curtas cumposiziuns.

L'ovra «Legend of a Mountain» descriva schizunt ina legenda dramatica e snuaivla da las Alps da la Savoia. Tenor quella eri ina giada in pestgader che viveva cun sia famiglia al pe d’in culm. Ditg ha el piglià nagut ed ha lura empermess ch’el laschia liber il proxim pesch ch’el piglia. Strusch ditg quai ha el piglià in immens grond pesch. Il pestgader ha dentant emblidà sia empermischun e pestgà vinavant e tratg or da l’aua sco proxim in giat nair viv ch’el ha prendì a chasa. Il giat ha fatg or da la vita dal pestgader in veritabel enfiern. Il giat ha regularmain attatgà e pli tard mazzà l’entira famiglia e cumenzà a terrorisar l’entira regiun enfin ch’in schuldà ha sajettà il giat. L’entira legenda ha Jacob de Haan mess en musica cun tutta dramatica e schizunt cun il sajet mortal.

I dat dentant er cumposiziuns pli legras e divertentas da giats, per exempel «The waltzing cat» da Leroy Anderson.

RTR Artg musical 14:00

Artitgels legids il pli savens