A chaschun dal di da la mamma din ellas duas «grazia» cun musica … Grazia ad insatgi, grazia per in mument u simplamain grazia da pudair esser qua. Tocs instrumentals fitg calms e pensivs, chanzuns da rock dals onns 1970 ed anc bler auter procuran per in viadi musical plain tensiun e variaziun.
Ditg n'hai jau betg propi realisà ch’igl è en sasez in grond privilegi da vegnir sin il mund cun ina vusch che funcziuna simplamain.
Tgi èn las duas musicistas?
Paula Mia Cadonau è creschida si a Glion ed abita ussa a Turitg. Là studegia ella chant da jazz a la ZHdK. Gia da mattina è ella vegnida en contact cun musica da jazz. Quest contact plitost nunconscient è dentant finalmain stà ina da las clavs per sia via professiunala. Cun sia band che sa numna «Paula Mia» sa mova ella dentant principalmain en il mund dad «indie folk».
Jau chat en la musica in lieu per m’enzugliar en tuns e m’exprimer plitost uschia.
La segunda protagonista da l'emissiun è l'Engiadinaisa Bigna Guler ch'è creschida si a Brail. Ella studegia orgelin svizzer a la Scola auta da musica a Lucerna. Cun blera marveglia ed ina pruna schlantsch d'experimentar sa deditgescha ella a la musica populara. Cumenzà aveva tut cun sunar uras a la lunga adina be trais tuns sin l'orgelin da maun da sia tatta.
Musica è per mai...
Descriver, tge che musica munta per ins sez n'è gnanc uschè simpel. Tuttina han las duas musiscistas provà d'explitgar quai ord lur atgna vista.
