Grazia a Hanny Christen datti anc ozendi blers sauts vegls e tradiziunals che vegnan sunads da bleras furmaziuns. Ella ha vivì dal 1899 fin dal 1976 ed ha ramassà in grond stgazi da musica populara, sauts che fissan forsa ids a perder. A partir dal 1940 aveva ella notà millis da melodias e bleras da quellas n’avevan nagin titel, quels vegnivan numnads simplamain «Schottisch», «Mazurca» ubain «Polca», e survegnivan anc in numer.
Sia metoda era simpla: ella viagiava tras tut la Svizra as fermava tar purs e musicants e ramassava notas o scriveva si savess quels sauts. Uschè ha ella stgaffì durant 20 onns ina collecziun ed in stgazi incumparabel. Quel è però restà en la sumbriva ed ella ha survegni pauca reconuschientscha. Il 1963 ha ella surdà sia collecziun a la biblioteca da l’universitad da Basilea – e là resta ella durant 30 onns.
La collecziun da Hanny Christen tar la chasa editura Mülirad
-
Bild 1 von 5. La collecziun. Bildquelle: MAD.
-
Bild 2 von 5. Peter Gisler da la chasa editura Mülirad. Bildquelle: MAD.
-
Bild 3 von 5. Digitalisar las notas veglias. Bildquelle: MAD.
-
Bild 4 von 5. Il pli impurtant: sunar ils sauts vegls. Bildquelle: MAD.
-
Bild 5 von 5. Fabian Müller ha scuvert il stgazi. Bildquelle: MAD.
Cha la collecziun na sparescha per adina en las profunditads dal archiv avain nus d’engraziar a Fabian Müller. Il 1992 chatta el per cas il relasch da Hanny Christen. Ils 12'000 sauts vegnan sortids, cataloghisads – ina lavur immensa – e dal 2002 vegn publitgada la collecziun da la chasa editura Mülirad. E per questa gronda lavur survegn ella uss in premi da musica svizra spezial.
Nova vita per sauts emblidads
Suenter la publicaziun datti grond interess da chapellas e furmaziuns che cumenzan a sunar quels sauts: la chapella Stelser Buaba, la Schwyzerörgeli-Musig Mutschellen, Peter Gisler & Die Müliradler, la Hujgroup e bleras autras.
La pli impurtanta è però la Hanneli-Musig, fundada il 2002 aposta per far reviver las melodias veglias. Ils musicants da vaglia Dani Häusler, Fränggi Gehrig (fin il 2008 Markus Flückiger), Ueli Mooser, Peter Gisler (fin il 2018 Christoph Mächler), Fabian Müller e Johannes Schmid-Kunz han registrà 8 discs cun sauts da tut la Svizra, han fatg tschients concerts ed han procurà ch’ils sauts da la collecziun da Hanny Christen na restan be en ils truclets.
Dapli da la Hanneli-Musig
En il Museum da Basilea Pajais datti dapi ils 22.05 fin ils 11.09.2022 ina exposiziun speziala: Musighanneli. Die Volksmusik-Sammlerin Hanny Christen