Hans Huber è naschì ils 28 da zercladur 1852 ad Eppenberg-Wöschnau / chantun Soloturn e mort da Nadal 1921 a Locarno. Sco figl d'in musicant amatur è el vegnì sco buob da 10 onns en l'institut da partists (ina part da la Stiftskirche Soloturn) e survegnì ina scolaziun sco mattet da chant (Sängerknabe). Gia baud ha el mussà ses talent al clavazin. Il 1870 cumenza el sia scolaziun musicala a Leipzig tar Carl Reinecke.
Suenter in’emprima plazza sco scolast da musica en l’Alsazia è el lura vegnì il 1877 a Basilea nua ch’el ha l’emprim lavurà sco scolast da clavazin a la scola da musica ch'el ha manà davent dal 1896. El è stà in musicist zunt engaschà ed ha tranter auter er animà (ensemen cun Friedrich Hegar) da fundar il STV (Schweizerischer Tonkünstlerverein). Il 1892 ha l'universitad Basilea onurà el cun il titel da docter honoris causa. Huber è stà in cuniniziant dal conservatori da Basilea ch’è vegnì fundà il 1905. Betg il davos grazia a sia fitg buna rait en l’entira Europa ha el purtà grond renum al conservatori ch’el ha manà fin il 1918 sco directur.
L’ovra musicala da Huber pareva d’esser ida in pau en emblidanza. Ils ultims onns han sias ovras fatg tras ina respectabla renaschientscha. I ha dà intgins novs discs cumpacts surtut cun sia musica da clavazin e per chors. En l’emissiun datti musica per orchester da Huber che tutga tar ils cumponists da la romantica tardiva. El è vegnì numnà sco «pli elegant dals cumponists da la romantica tardiva».
Hans Huber è stà in patriot. Quai cumprovan er ses gieus al liber ch'el ha scrit per la «Kleinbasler Gedenkfeier» u per il giubileum da 500 onns Basilea («Der Basler Bund 1501». Sia emprima sinfonia porta il titel «Tell-Sinfonie» ed era sia sinfonia nr. 7 ha sco suttitel «Schweizerische».
Dapli da Hans Huber
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.