Per l'emprima giada ha la Zürcher Singakademie realisà in agen portatun cun chant a cappella. Cun quest disc cumpact mussa la formaziun d'auta qualitad sia identitad musicala ed emoziunala ed avra la porta ad ina cuntrada da musica svizra singulara. Cun «Herzblut», uschia il titel dal disc cumpact dat il chor invista en la lavur cumpositorica da cumponistas e cumponists svizzers, da la romantica fin il temp actual.
Cun la litteratura elegida preschentan las 32 chantaduras e chantadurs ovras francadas en la cultura svizra ed era cumposiziuns anc main enconuschentas. Pliras ovras èn per l'emprima giada vegnidas registradas per in portatun, uschia per exempel era l'ovra «Ina sera da bial'aura» da Helena Winkelman. La cumponista e violinista oriunda da Schaffusa posseda ina «signatura persunala marcanta». Sia musica vegn represchentada sin l'entir mund. Da curt ha l'Artg musical preschentà si'ovra «Minimal Minima» nua ch'ella ha integrà il ritmus dals talers da la Tessanda Val Müstair.
Auters cumponists svizzers ch'èn d'udir èn Hans Huber, Richard Flury, Cyrill Schürch e Kurt Widorski. In'ovra speziala è quella da Burkhard Kinzler. Sin incumbensa da la Zürcher Singakademie ha el scrit l'ovra «Herbstsynkopen». Quellas sincopas musicalas metta el visavis als chants da Johannes Brahms en si'ovra «Fünf Gesänge für Chor a-cappella (op. 104)». Ina interessanta cumposiziun nua ch'il cumponist tudestg dilucidescha las chanzuns da Brahms ord diversas perspectivas ed interpretescha els cun differents meds vocals.
Il chor
La Zürcher Singakademie tutga en l'Europa tar ils megliers chors professiunals grazia a sias preschentaziuns inspirontas sco chor sinfonic ed ensemble a-cappella. Dapi sia fundaziun l'onn 20211 ha il chor collavurà cun dirigents da renum sco per exempel Daniel Barenboim u Paavo Järvi.
Dapi il 2017 è Florian Helgath il manader artistic ed ha realisà regularmain concerts en las grondas chasas da concert en l'Europa (Berliner Festspiele, Schwetzinger Festspiele, Eclat Festival Neue Musik Stuttgart u er la Ruhrtriennale).
Ses emprims pass musicals ha Florian Helgath fatg a Regensburg tar ils Regensburger Domspatzen.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.