Siglir tar il cuntegn

Header

audio
Joachim Raff – il cumponist emblidà
Or da Artg musical dals 04.09.2022.
laschar ir. Durada: 1 minuta.
cuntegn

Artg musical Joachim Raff – in grond cumponist in zic emblidà

Josef Joachim Raff è creschì si a Lachen (SZ). Ses bab, magister e scolast da musica Franz Josef Raff, era fugì il 1810 dal Würtemberg en Svizra. A Lachen ha el maridà Katharina Schmid, la figlia d'in ustier. Malgrà sia gronda reputaziun è ses num ì en emblidanza suenter sia mort il 1882.

Il figl Josef Joachim Raff è naschì ils 27 da matg 1822 e ses bab n'ha betg pudì finanziar ad el ina scolaziun cumplessiva. Il buob ha cumenzà baud ad exercitar violina, clavazin ed orgla e quai sco autodidact. L'onn 1838 è la famiglia Raff sa chasada a Schmerikon lura a Sviz.

Cura ch'il nunzi papal ha duvrà in translatur en ina chaussa uffiziala è Joachim daventà cun 18 onns accumpagnader dal nunzi. Anc il medem onn (1840) è el daventà magister a Rapperswil. Ses grond interess era dentant la musica e gia quatter onns pli tard ha el chalà a dar scola ed è sa deditgà cumplainamain a la musica. El ha dà uras da clavazin e cumenzà a cumponer. L'onn 1844 ha la chasa editura Breitkopf & Härtel stampà emprimas ovras per clavazin da Raff e quai sin recumandaziun da Felix Mendelssohn Bartholdy.

Emprims success a Weimar

Il 1845 ha el emprendì d'enconuscher Franz Liszt, ses grond idol, e lez ha engaschà el sco secretari. En quest temp ha Raff er pudì festivar emprims success cun sias cumposiziuns. Suenter grondas differenzas cun Liszt è Raff sa domicilià il 1849 a Stuttgart nua ch'el ha emprendì d'enconuscher Hans von Bülow. Be in onn pli tard è el turnà a Weimar tar Liszt e dal 1850 fin il 1856 è el stà ses assistent e secretari privat. Ses pensum principal era d'instrumentar per orchester las ovras da Liszt. Uschia ha l'autodidact emprendì bler. A Weimar ha Joachim Raff lura cumponì si'emprima sinfonia. El aveva in grond talent da cumponer e bainbaud ha el gì success. Fitg enconuschent è Raff vegnì cun sia opera «König Alfred» e la sinfonia nr. 3 «Im Walde».

Fritgaivla lavur a Wiesbaden

Il 1856 ha Raff bandunà Weimar ed è sa chasà a Wiesbaden nua ch'el ha lavurà fin il 1877. Sper sia lavur sco magister da clavazin e docent per armonia vala quest temp a Wiesbaden sco la fasa la pli productiva da sia lavur cumpositorica. Dapi l'entschatta dals onns 1870 ha el pudì lavurar sco cumponist liber. Il 1878 è el vegnì clamà a Francfurt sco directur dal conservatori. Durant tschintg onns ha el cumprovà sias abilitads sco pedagog da musica ed organisatur. Sia reputaziun sco cumponist e directur da conservatori era gronda.

Mort a Francfurt

Ils 24 da zercladur 1882 è Joachim Raff mort en consequenza d'in infarct dal cor en si'abitaziun a Francfurt. Durant sia vita era el in tip polivalent e productiv cun in intelletg gizzà. El è daventà in dals cumponists ils pli dumandads e sias ovras èn vegnidas sunadas savens. Suenter sia mort è quai sa midà ed il 20avel tschientaner era Raff quasi emblidà e sias ovras n'èn strusch pli stadas d'udir en las salas da concert. Quest onn, a chaschun da ses 200avel anniversari sa mida quai. Diversas occurrenzas stattan sin il program da l'onn da festa, tranter auter divers concerts, in simposi, in'exposiziun ed in festival da musica da chombra. Tut quellas laschan reviver la musica da Joachim Raff e vulan dar al cumponist emblidà puspè dapli attenziun.

L'ovra da Raff cumpiglia sis operas, 11 sinfonias, numerusas ovras per orchester, ovras per chor ed orchester sco era differentas cumposiziuns per clavazin ed instruments a corda.

RTR Artg musical 15:00

Artitgels legids il pli savens

Scrollar a sanestra Scrollar a dretga