Siglir tar il cuntegn

Header

audio
Joy to the World – Musica per Nadal
Or da Artg musical dals 25.12.2022. Maletg: Keystone
laschar ir. Durada: 2 minutas.
cuntegn

Artg musical Joy to the World – Musica per Nadal

L'Artg musical da la dumengia da Nadal porta musica festiva e pompusa che duai legrar noss public. Durant duas uras datti in concert da Nadal «Joy To The World» ed in oratori da Nadal main enconuschent, «Ein Weihnachtsoratorium» da Christoph Graupner.

En l'istorgia da musica sa mussa il plaschair da Nadal betg mo a moda quieta e pensiva mabain er festiv, schizunt pompus. En il center da l'emissiun stat d'ina vart in concert da Nadal dal WDR Rundfunkchor & Sinfonieorchester e da l'autra vart in oratori pauc enconuschent.

Joy to the World

En il center dal program dal WDR Rundfunkchor stat la «connection» britannic-tudestga, vitiers datti musica da Nadal ord la Svezia, dals Stadis Unids e schizunt da la Caribica. Igl è ina buna maschaida da chanzuns enconuschentas da Johann Sebastian Bach, Georg Friedrich Händel e John Rutter ed ovras main enconuschentas da Errollyn Wallen, Jan Sandström u Morten Lauridsen. La registraziun è in concert live dal WDR Rundfunkchor (in chor da 40 chantaduras e chantadurs professiunals) e dal WDR Sinfonieorchester (fundà il 1947). Il concert dal 2021 ha dirigì Simon Halsey ch'è dapi il 2020 directur creativ per musica da chors e projects extraordinaris per il WDR Rundfunkchor.

Ein Weihnachtsoratorium

Gia durant il temp che Christoph Graupner (1683 – 1760) ha vivì ha el giudì gronda reputaziun. El era in contemporan da Bach, Telemann, Fasch ed auter. L'ovra da Graupner è voluminusa e cuntegn operas, concerts, suitas d'orchester, musica da chombra, ovras per clavazin e passa 1'400 cantatas. Ellas cumprovan sia forza da creativitad e la qualitad da sias ovras è permanentamain auta. En blers reguard represchenta Graupner la persunificaziun dal dirigent d'orchester (Kapellmeister) perfetg.

Graupner è naschì a Kirchberg, ha studegià a Leipzig e Hamburg ed è lura vegnì pladì dal cont Ernst-Ludwig von Hessen-Darmstadt sco dirigent d'orchester. A Darmstadt è Graupner stà fidaivel fin sia mort. Cun bunamain 70 onns ha el scrit la cantata da Nadal «Jauchzet dem Herrn», e malgrà ch'el ha fin lura scrit gia passa 1'400 cantatas ed è tuttina plain energia ed inspiraziun en ses stil frestg e modern. El merita dapli reputaziun e sia musica pudess esser pli preschenta en concerts da musica da barock.

RTR Artg musical 14:00

Artitgels legids il pli savens

Scrollar a sanestra Scrollar a dretga