Per la dumengia da Pasca datti in Artg musical cun ovras da bab e figl, e vus pudais allegrar sin l’oratori da Pasca e sin la messa en g-moll da Johann Sebastian Bach (emprima part) e sin il Magnificat per solistas, cor ed orchester da ses figl Carl Philipp Emanuel Bach (segunda part).
L'oratori da Pasca
L’oratori da Pasca da Johann Sebastian Bach è vegnì preschentà l’emprima giada il prim d’avrigl dal 1725, ina dumengia da Pasca. Pli tard datti lura anc trais autras versiuns, cun in pèr grondas differenzas en congual cun l’original. En questas na datti betg pli persunas biblicas che raquintan l’istorgia da la suffrientscha da Jesus, la furma è pli neutrala.
Magnificat
Carl Philipp Emanuel Bach stat en il center da la segunda ura da l'Artg musical. El è naschì ils 8 da mars 1714 a Weimar e mort ils 14 da december 1788 a Hamburg ed è il pli renumà ed enconuschent dals 6 figls da Johann Sebastian Bach.
Il 1749 ha el cumponì ses Magnificat per soli, cor ed orchester – e quel udis en ina registraziun dal 2014 cun il Rundfunkchor Berlin, l’orchester da chombra «Carl Philipp Emanuel Bach» e ses dirigent Hartmut Haenchen. Questa furmaziun cun 25 musicistas e musicists dals gronds orchesters da Berlin è vegnida fundada il 1969 ed è sa spezialisada sin il repertori da la classica tempriva e surtut sin las cumposiziuns da Carl Philipp Emanuel Bach. L’orchester ha existì fin il 2014 ed ha participà a blers festivalsimpurtants ed ha registrà passa 60 portatuns.