L'emprim'ura da l'Artg musical dad oz è deditgada plainamain a la festa federala da musica populara dals 21 fin 24 da settember. Quella è stada per la 14avla giada – e per l'emprima giada en il Tessin, a Bellinzona. Da gievgia fin dumengia han passa 80'000 visitadras e visitaders pudì giudair musica populara preschentada da var 2'000 musicantas e musicants e 250 furmaziuns. Quellas han sunà sin 14 palcs passa 400 concerts.
Da la partida: bleras furmaziuns e chapellas da tut la Svizra, mintgina cun ses stil e quai ha procurà per gronda variaziun. Però questa giada hai era dà blera musica dal sid da las alps, cun bandellas, furmaziuns da mandolina e chanzuns popularas tessinaisas. RTR ha registrà diversas da quellas chapellas e furmaziuns e perquai udis oz in Artg musical deditgà a la festa da Bellinzona. Nus avain preparà in’ura cun blers tocs sco: «La Lingera», «Grappa di Gordola», «La bella Ernestina», «Auf dem Plomberg», «I campan da Bellinzona» e «La bucca è scu'na porta». E sunar sunan las chapellas «Ländlerkompass», «Quartetto Prisma», «Wybergstürm», ils «Fränzlis da Tschlin», «Ohalätz e Lisa Stoll», «Vent Negru» e Flavio Calderari.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.