Siglir tar il cuntegn

Header

audio
Chor viril Ligia Grischa sin viadi
Or da Artg musical dals 16.10.2022. Maletg: MAD
laschar ir. Durada: 1 minuta.
cuntegn

Artg musical La Ligia Grischa sin viadi

Cun quest disc vul la Ligia Grischa mussar ch'el sa mova e s'adattescha al temp dentant senza negliger u snegar sias ragischs ch'èn francadas en la chanzun rumantscha.

Dapi 170 onns exista il chor viril Ligia Grischa e durant quests onns d'existenza èn vegnidas stgaffidas numeruras cumposiziuns rumantschas. Il fundament per las chanzuns han tschentà ils poets e scrivents cun lur texts. Sin il nov portatun da la Ligia Grischa è da chattar ina vasta paletta dal chant rumantsch. Duas giadas bab e figl (Tumasch e Benedetg Dolf, Gion Balzer e Gion Andrea Casanova), ils cumponists Gion Antoni e Gion Giusep Derungs ed intgins semperverds sco per exempel «La patria» u «Il pur suveran» na dastgan natiralmain er betg mancar.

Il president partent Aurelio Casanova ha dà pled e fatg davart las ponderaziuns per quest nov portatun.

audio
Aurelio Casanova: «Nus vulain mussar che la Ligia Grischa n'è betg statica.»
ord Artg musical dals 04.10.2022. Maletg: MAD
laschar ir. Durada: 10 minutas 12 Secundas.

Sper las chanzuns rumantschas datti er talas en lingua franzosa u tudestga e per schluccar datti tranteren adina puspè intermezzis instrumentals or da l'ovra «Il stroli» per clarinetta, corn basset e clavazin. Tschintg da las 11 istorgiettas dal ciclus èn en la versiun per quintett (Stella Ingrosso, flauta traversa / Josias Just, clarinetta / Elisabeth Göring, fagot / Cornelia Brandis, violina / Luzius Gartmann, cello) e trais istorgiettas èn en la versiun da clavazin, sunadas da Andriy Dragan.

La Ligia Grischa

Avrir la box Serrar la box

Il chor viril Ligia Grischa è vegnì fundà l'onn 1852 sin l'iniziativa dal spiritual Gion Martin Darms da Flond cun l'incumbensa primara da promover il chant viril rumantsch.

Dapi il 1924 stat il chor sut la direcziun da musicists da professiun: Robert Cantieni, Hans Lavater, Walther Aeschbacher, Ernst Schweri, Gion Giusep Derungs, Peter Appenzeller. Dapi il 2012 diregia Christoph Cajöri.

RTR Artg musical 14:00

Artitgels legids il pli savens