Sin lur giubileum da 50 onns «Chor dils Larischs» (l'onn 2020) ha la furmaziun virila incumbensà ils frars Curdin e Domenic Janett dad arranschar in medley da diversas chanzuns popularas rumantschas, talianas e tudestgas. Igl è ina cumposiziun ordvart divertenta, variada ed er legra cun il titel «Danunder hai jeu priu la canzun?». Il medley vegn accumpagnà dals fargliuns Sarott da Scuol, Flurina suna la violina e Janic il vibrafon. La fin d'october ha RTR registrà la cumposiziun e quella pudais vus tadlar en l'emissiun Artg musical. Igl è il medem mument er il cumià dal dirigent Curdin Christoffel.
Muort la pandemia da corona n'ha il chor betg pudì preschentar la cumposiziun avant publicum. Cunquai che RTR ha registrà quell'ovra pudais vus tadlar ella en l'emissiun Artg musical nua ch'i dat era anc ulteriuras registraziuns dals ultims decennis dal chor viril.
Registraziun dals 30-10-2021
-
Bild 1 von 6. Curdin Christoffel en cumplaina acziun. Bildquelle: RTR, Hugo Schär.
-
Bild 2 von 6. Avant che cumenzar cun la registraziun guarda il dirigent ch'ils chantadurs vegnan a chaud. Bildquelle: RTR, Hugo Schär.
-
Bild 3 von 6. Ils 24 umens dal chor èn attents e taidlan tiers a lur dirigent. Bildquelle: RTR, Hugo Schär.
-
Bild 4 von 6. Avant che registrar exercitescha Curdin Christoffel anc intginas passaschas. Bildquelle: RTR, Hugo Schär.
-
Bild 5 von 6. Il dirigent vid la lavur da detagl. Bildquelle: RTR, Hugo Schär.
-
Bild 6 von 6. Flurina e Janic Sarott accumpognan il chor sin violina e vibrafon. Bildquelle: RTR, Hugo Schär.
Suenter la registraziun en la sala da la baselgia da la Crusch a Cuira ha Curdin Christoffel anc dà pled e fatg davart la preparaziun e las emprovas per il medley, sco era ses sguard enavos persunal sin ses 10 onns sco dirigent dal Chor dils Larischs.
Dapli
Ambäck (musica populara contemporana)
Danunder hai jau prendì la chanzun? Questa dumonda pudess ins er tschentar a l'ensemble da musica populara Ambäck (in pled da dialect da la Svizra Centrala che munta tant sco «tschep da laina»). Ils trais musicists svizzers chaminan gia dapi blers onns musicalmain sper las sendas usitadas da la musica populara tradiziunala. Il trio Andreas Gabriel, Markus Flückiger e Pirmin Huber ha «revoluzionà» en in tschert senn la musica populara svizra. Gist perquai ch'els domineschan il repertori tradiziunal, pon els schlargiar quel cun improvisaziuns e sa muventan cun facilitad tranter tradiziun e musica populara contemporana. La furmaziun da violina, orgelin e cuntrabass sa basa sin ina musica da saut enturn 1900 en il Muotathal, chantun Sviz.
La registraziun è in concert live dal «Alpentönefestival» da l'avust 2021 or dal Teater Uri ad Altdorf. Ils titels che Ambäck suna van magari in en l'auter. Lur atgnas cumposiziuns han nums sco: «Mood», «Raum», «Eau de chien», «Vliesen bereit», «Stöpsel Nr. 8» u «E sturen Esel».