«Liebeszauber»
Uschia il motto d'in concert da l'orchester da chombra da Basilea. Ina cumposiziun per ballet da Manuel de Falla «El amor brujo» ha inspirà il dirigent Francisco Coll d'eleger la magia da l'amur sco motto dal concert. L'ovra raquinta l'istorgia d'ina vaiva che s’inamurescha da nov suenter la mort da ses um tirannic. E tge fa il spiert da l'um barmier? El è schiglius e persequitescha la dunna en mintga chantun da sia vita libra e vul impedir la nov’amur. La dunna ha però amias cun forzas magicas che gidan ella. Ella tira in tschertgel magic e sauta en quel il sault dal fieu che carmala natiers il spiert da ses um barmier. Lez lai tschorventar e surmanar e brischa en il tschertgel, uschia che la dunna è ussa deliberada e po finalmain charezzar ses nov ami.
Las autras duas ovras en l'emissiun mussan medemamain sin ina moda u l'autra l'amur. «La oración del torero» è ina cumposiziun davart urar per l'agid divin en situaziuns grevas e difficilas e en il concert per dus orchesters, clavazin e pauca vai per l'amur per la patria. Bohuslav Martinu ha terminà l'ovra il 1938 cura ch'el era sin visita en Svizra e gist in di avant ch'igl è vegnì suttascrit a Minca l'uschenumnà «Münchner Abkommen». Entras quella cunvegna n'ha Martinu betg pli pudì turnar en sia patria perquai che las truppas tudestgas han conquistà quella.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.