Maria Callas, u cun ses num burgais Maria Anna Cecilia Sofia Kalogeropoulos, è stada ina chantadura oriunda da la Grezia, dentant naschida ils 2 da december 1923 a New York sco segunda figlia da George Kalogeropoulos ed Elmina Evangelia Dimitriadou. Els eran pir dapi sis mais en ils Stadis Unids. Il 1929 ha ses bab midà il num da famiglia en Callas suenter ch'el aveva avert dus onns avant in'apoteca.
Il 1937, cun 13 onns, è Maria turnada cun sia mamma e sia sora ad Athen, en Grezia. Ses geniturs eran ids in ord l'auter. Sia emprima preschentaziun publica ha ella gì il november 1938 en Cavalleria rusticana. Quai era anc durant ses studi al conservatori ad Athen tar Elvira de Hidalgo. Ella è stada ina ordvart diligenta studenta ed ha cumenzà a sviluppar ses potenzial enorm.
L'avust 1942 ha ella per l'emprima giada chantà la rolla da Tosca a l'opera naziunala ad Athen. A la primaudiziun da l'opera Fidelio (Ludwig van Beethoven) en la Grezia ha ella surpiglià il 1944 la rolla principala. Il 1945 è ella returnada a New York ed è vegnida scuverta dal tenor Giovanni Zenatello ch'era adina sin la tschertga da talents per l'arena da Verona. Autras funtaunas rapportan ch'il dirigent Tullio Serafin haja udì la Callas tar in chantar avant a New York ed haja directamain pladì ella per l'opera a Verona. En scadin cas ha Maria Callas dà il 1947 ses debut a Verona en l'opera «La Gioconda» e sut la direcziun da Tullio Serafin.
Suenter ses debut a Verona è Callas sa domiciliada en l'Italia ed ha maridà in interprendider. Il dirigent Tullio Serafin è stà ses cussegliader musical ed ha promovì sia carriera a moda decisiva. Cura ch'ella era vidlonder da sa far in num cun grondas rollas sco Turandot, Aida e Norma ed era Isolde e Brünnhilde da Wagner ha ella stuì siglir en per ina sopranista a l'opera da Venezia La Fenice. Maria Callas ha persvadì ed intgantà en la rolla d'Elvira dall'opera I puritani da Bellini uschè bain che quella saira ha avert ad ella ulteriuras portas.
Pauc pli tard ha ella fatg emprimas registraziuns ed è stada en diversas chasas d'opera en l'Italia (inclusiv a la Scala da Milaun) ed er en l'America latina. Il 1951 ha ella chantà las emprimas giadas la rolla da Violetta en l'opera La Traviata. Cura che sia carriera ha cumenzà a girar ha ella era fatg tras ina metamorfosa corporala. Aifer in onn e mez ha ella pers 30 kilos ed è daventada ina figura ordvart eleganta sin e sper la tribuna.
Dapli da Maria Callas
Il 1950 ha ella dà sia premiera en La Scala en la rolla principala d'Aida ed è daventada la «primadonna assoluta» da la chasa d'opera a Milaun. Ella ha festivà gronds success e triumfs, in dals puncts culminants è stà il 1957 cura ch'ella ha persvadì en l'opera Anna Bolena da Donizetti. Er bleras impurtantas registraziuns èn capitadas en la Scala, per exempel il 1953. La registraziun da Tosca sut la direcziun da Victor de Sabata vala sco ina da las meglras insumma, fin oz in classicher.
Suenter tensiuns, per part massivas, tranter Callas e l'intendant da la Scala Antonio Ghiringhelli, ha la chantadura bandunà la chasa d'opera. Il 1960 è Maria Callas anc ina giada returnada a la Scala e l'ultima preschentaziun a Milaun ha ella dà il 1962 sco Medea da Cherubini.
La Divina – ils onns glorius
Ses fans talians han numnà Maria Callas «La Divina» e vairamain è ella stada ils onns 50 ina regina, ina dieua sin las tribunas d'operas sin l'entir mund. Il 1953 ha ella chantà per l'emprima giada a Londra en il Royal Opera House, in onn pli tard a Chicago al Civic Opera House. 1955 l'emprima preschentaziun a Berlin sut la direcziun da Herbert von Karajan ed il 1956 l'emprima giada a la Wiener Staatsoper sco er a New York, a la Metropolitan Opera.
Il december 1958 ha ella dà sia premiera a l'opera da Paris. Il concert spectacular è stà l'eveniment da la stagiun. En il public seseva er in um che dueva midar sia vita: il possessur da navs grec Aristoteles Onassis.
Il 1949 aveva Callas maridà l'interprendider Giovanni Battista Meneghini ch'era bunamain 30 onns pli vegl ch'ella. Il 1959 ha Onassis envidà ils Meneghinis sin sia nav da luxus ad ina cruschera sin la Mar Mediterrana. Per Callas era quai in nov mund ed ella è s'inamurada en l'ospitant scharmant-dinamic. Onassis era gia maridà, dentant ha Callas bandunà ses um paucas emnas suenter quest viadi.
La relaziun cun Onassis ha tegnì nov onns. Callas è sa bittada en la vita da jetset ed ha reducì a moda drastica sias preschentaziuns. Ella ha siemià d'ina letg cun Onassis ed uffants. Il 1968 ha Onassis dentant maridà tut surprendentamain Jacqueline Kennedy, la vaiva dal president american assassinà. Callas era offendida e par terra.
Ses cumià sin la tribuna da l'opera ha Callas dà il 1965 sco Tosca a Londra e suenter è ella pli u main sa messa a ruaus. Ella ha anc surpiglià la rolla da Medea en in film e registrà intginas arias. Sin in viadi da concert tras l'Europa, l'America dal nord, la Corea ed il Giapun il 1973 era ella be anc la sumbriva da sasezza.
Ses ultims onns da vita eran segnads da solitariadad e problems da sanadad. Ils 16 da settember 1977 mora ella a Paris probabel en consequenza d'in infarct dal cor. Ella aveva be 53 onns.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.