Max Jendly è naschì ils 3 da mars 1945 a Friburg. Suenter ses studi da scienza d'economia ha el lavurà sco stampadur e schurnalist. Suenter ina furmaziun musicala è el sa deditgà davent dal 1979 al jazz. Sin giavisch dal chantun Friburg ha el avert al conservatori da Friburg la partiziun da jazz. Igl è stada l'emprima da quest gener en Svizra. El ha instruì clavazin da jazz ed arranschament ed ha manà las classas d'ensemble sco era la big band dal conservatori. El è iniziant da la «jazz parade», il festival da stad sin la plazza George Python, ed ha er fundà il club da jazz «La Spirale». Dapi il 1991 è el directur artistic da la Big band dal conservatori da Friburg. El dat anc adina concerts, ha edì divers albums ed ha er cumponì. Per las festivitads da 700 onns Confederaziun ha el cumponì sin incumbensa dal chantun Friburg la «Cantate helvétique No 91» e per la Expo.02 il musical «Fantasma». Omaduas ovras ha el manà si gist sez.
Il 2017 ha el fundà la «Max Jendly Big Band» (MJBB), in orchester professiunal permanent per musica moderna. La direcziun da «sia» big band ha el entant surdà al mexican Gerry Lopez. Sco concert da cumià ha Max Jendly gì l'idea da far ina saira da gala a la Schubertiade d'Espace 2, la MJBB ensemen cun in orchester da chombra da musicistas e musicists professiunals da l'Ucraina ch'èn fugids en Svizra.
L'Artg musical porta parts da quest concert da cumià.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.