Siglir tar il cuntegn

Header

audio
Misa Tango – musica d'accordeons
Or da Artg musical dals 22.01.2023. Maletg: colourbox
laschar ir. Durada: 1 minuta.
cuntegn

Artg musical Misa Tango – musica d'accordeons

L'Artg musical metta en il center l'accordeon, l'instrument che tuna magari sco in entir orchester. D'udir è in concert da gala e singulas preschentaziuns d'interpretas ed interprets a la concurrenza «coupe mondiale d'accordeon» ch'è stada l'atun passà a Zofingen, chantun Argovia.

L'october 2022 è stà a Zofingen la concurrenza internaziunala d'accordeons. Quella è vegnida enramada cun in concert da gala tut spezial. L'orchester Akkordeon Brittnau ensemen cun il chor SOLAND Chorkunst ed ils chors da las scolas chantunalas da Baden e Zofingen, Susanne Wiesner (alt), Gregor Loepfe (clavazin), Julien Tudisco (bandoneon) e sut la direcziun generala da Ruth Soland han sunà la «Misa Tango – Misa a Buenos Aires» da Martin Palmeri.

Quai è probabel la pli enconuschenta ovra e quella cun il pli grond success fin uss da Palmeri. La «Misa Tango» è gia vegnida preschentà en 16 pajais, savens era cun Palmeri sez vid il clavazin. Inspirà Palmeri per l'ovra ha Astor Piazzolla cun sias cumposiziuns da tango. Per la «Misa Tango» ha Palmeri (*1965) «fusiunà» la messa latina cun ils tratgs caracteristics dal tango nuevo argentin. Quest sintesa da stil è grategiada fitg bain e persvadent. Per il Kyrie ed l' Agnus Dei ha el lavurà cun fugas e contrapunct. En il Credo, tar la crucifigaziun, cumpara l'accord sminuì che steva durant tschientaners per il pli sgarschaivel – la mort, stat però en l'equiliber. Quai ha tradiziun en l'America latina, per exempel en las «Bachianas brasileiras» da Hector Villa-Lobos u en diversas parts da tangos da Piazzolla.

Coupe mondiale – campiunadi mundial

L'occurrenza a Zofingen è stada la 75avla ediziun. En diversas categorias èn en total 83 ccordeonistas ed accordeonists da bunamain 30 pajais sa mesirads avant ina giuria ed han cumbattì per il titel. En l'emissiun èn d'udir Anastasija Zubova (2. rang, categoria junior), Emanuele Viti (1. rang, categoria junior) e Dragoslav Vasiljevic (1. rang, categoria senior).

RTR Artg musical 14:00

Artitgels legids il pli savens