«Nachts wird mir wetter» è l'istorgia d'in svanir. Set maletgs mussan staziuns ord la vita da Fravi, il protagonist che suonda decisivamain dentant er nunvoluntari la via en l'interiuradad pura ed uschia la via en sia autoschliaziun. Igl è in'ovra audiovisuala en trais linguas (tudestg, dialect grischun e sursilvan) per mezzosopran, sautunza, pledader, ensemble ed orchester.
«Nachts wird mir wetter» è ina reflexiun, ina ponderaziun davart il stadi psichic da la persuna principala Fravi. I n'è betg manegià l'aura en il liber mabain plitost l'aura che la persuna possia far en l'intern, en ella.
Fravi è il bab e vegn represchentà en l'ovra tras in pledader, sia dunna Seraina è ina rolla «mitta», ella s'exprima be cun saut. La terza persuna è lur figl Luca che vegn chantà d'ina mezzosopranista. Vitiers vegnan l'ensemble ö! cun Christoph Luchsinger (trumba) che gioga in'impurtanta rolla er per Luca – e la Kammerphilharmonie Grischun.
Il cuntegn
Il svanir da Fravi cumenza cun la diagnosa «lignificaziun», pia Verholzung. La malsogna sforza Fravi d'ina vart d'acceptar ella e da l'autra vart da midar sia vita. El fa quai sin ina moda radicala e talmain consequent, ch'el sa distanziescha pli e pli fitg da la famiglia e dal mund. I cumenza ina sort sa schliar. Sia corporalitad fa plaz a l'existenza en l'agen chau. Fravi è be anc chau ed imaginaziun, ses mund be anc patratgs. El è svanì ed uschia va l'ovra er a fin cun in sun fitg quiet e fitg da bass.
In runda da discurs dat invistas
En il rom da l'emissiun «Pavillon Suisse» (in'emissiun culturala da las segundas chadainas da SRF2 Kultur, RTS Éspace deux, RSI Rete due ed RTR) hai dà ina runda da discurs quadriling cun il cumponist Alfred Zimmerlin, il librettist Andreas Neeser, la sautunza e coreografa Maja Zimmerlin (Seraina) e la chantadura Mirjam Fässler (Luca) en il café dal teater da la citad da Cuira. Moderà la runda han Anne Gillot (RTS), Davide Fersini (RSI) e Hugo Schär (RTR). Patricia Moreno (SRF2) era malsauna.
L'«Artg musical» porta ina versiun resumada e pli curta da l'ovra «Nachts wird mir wetter». L'entira represchentaziun ha RTR filmà e quella pudais vus guardar qua.
Enjott Schneider
Sper la musica contemporana dal cumponist svizzer Alfred Zimmerlin datti en l'Artg musical era anc musica dal cumponist tudestg Enjott Schneider. El po festivar quest onn 75 onns ed è da chasa en bunamain tut las spartas da musica. El ha scrit numerusas ovras per orchester, orgla, musica da chombra, oratoris, musica vocala e musica sacrala sco era ovras per la tribuna ed era per il film.
Schneider abitescha a Minca, sesenta dentant universal. Sco quai ch'el scriva sin sia pagina d'internet – saja sia lavur ina tschertga permanenta suenter las ragischs arcaicas da la vita e da la structura profunda immateriala dal mund.
