Siglir tar il cuntegn

Header

audio
Musica per venderdi sontg
Or da Artg musical dals 07.04.2023. Maletg: Keystone
laschar ir. Durada: 2 minutas 14 Secundas.
cuntegn

Artg musical Musica per venderdi sontg

Per il di dal patir e murir da Jesus vi da la crusch porscha l'emissiun Artg musical la musica adattada: «Stabat mater» dad Antonin Dvořák e la «Trauermette» da Franz Rechsteiner.

Stabat Mater

Il Stabat Mater - la mamma plain da dolur - uschia la muntada d'ina poesia che tracta la dolur da Nossadunna per ses figl, il Jesus crucifitgà. In'ovra che ha er inspirà Antonin Dvořák. Igl è l'emprima cumposiziun che Dvořák ha cumenzà senza in'incumbensa. In mez onn avant, il settember 1875, era sia figlia Josefa morta be dus dis suenter la naschientscha e probablamain ha Dvořák sentì la medema dolur sco Nossadunna. Sco emprim ha el scrit da si'ovra las parts 1 fin 4 ed 8 fin 10. Tranteren ha el mess da la vart l'ovra fin il 1877 cura che dus ulteriurs uffants d'el èn morts aifer curt temp. En ses cordoli ha el chattà consolaziun cun scriver il Stabat Mater ch'el ha terminà il november 1877.

Trauermette zu Karfreitag 

La segund'ovra è la «Trauermette zu Karfreitag für Sprecher, Solostimmen, gemischten Chor, Klarinette, Fagott und Orgel» da Franz Rechsteiner. In'ovra in pau pli speziala davart il disdir ed il far naufragi. L'ovra ha duas parts pli grondas cun mintgamai trais sutpartiziuns. L'emprim toc sa basa sin texts dal profet Jeremia ed il segund toc texts ord ils evangelis. Er lamentaschuns ord il Veder Testament cumparan en la cumposiziun.  

RTR Artg musical 14:00

Artitgels legids il pli savens