Siglir tar il cuntegn

Header

audio
NJBB en mauns rumantschs
Or da Artg musical dals 02.10.2022.
laschar ir. Durada: 57 minutas 51 Secundas.
cuntegn

Artg musical NJBB en mauns rumantschs

Quest onn è stà per la 47avla giada il curs da stad da la Brass Band da giuvenils naziunala (NJBB) e quel va en l'istorgia. Per l’emprima giada èn las duas bands numnadamain stadas sut la direcziun da dus dirigents rumantschs: Corsin Tuor da la A-Band e Rafael Camartin da la B-Band.

Corsin Tuor è dapi decennis ina gronda persunalitad en la scena da brass. Cumenzà sia carriera ha el la fin dals onns 80 sco eufonist en la BML (Brass Band Bürgermusik Lucerna), pli tard sco dirigent. El è stà confundatur ed emprim dirigent da l'ensemble Cerchel Musical da la Surselva. Cun questa furmaziun ha el realisà projects gronds sco Classic Rock u Classic Cinema I e II. Il 1998 ha el survegnì dal chantun Grischun in premi da promoziun per sia lavur culturala. El è era iniziant dals discs cumpacts «Perlas rumantschas» (I. cun la Brassband Bürgermusik Lucerna, II. e III. cun la Brass Band Berner Oberland).

Plinavant ha el dirigì la BML Lucerna (B-Band), MG Risch-Rotkreuz e dal 1990 fin il 2015 la Brass Band Rickenbach. Actualmain diregia el la BBO (Brass Band Berner Oberland), la Brass Band Fröschl Hall (A, Tirol) e la 3BA Bayrische Brass Band Akademie (D, Minca). Sper sia lavur da dirigent è el magister da musica e schef da partiziun d'instruments a flad a la scola da musica Lucerna. Sco cumpossessur da la chasa editura lucerne musice edition (LME) è el editur, cumponist e scriva era arranschements.

Corsin Tuor

Avrir la box Serrar la box

Il dirigent è da l'annada 1963 e deriva da Trun. El ha studegià eufoni e direcziun al conservatori da Lucerna e fatg in master en management da musica a Berna.

Dapi il 2009 è el docent en direger / musica instrumentala a la scol'auta d'art a Berna.

El è maridà, ha dus uffants ed abitescha a Sempach.

audio
Corsin Tuor: «Igl è ina gronda onur da dastgar diriger quests giuvenils»
ord Artg musical dals 07.09.2022.
laschar ir. Durada: 5 minutas 40 Secundas.

Entant che Corsin Tuor ha dirigì avant passa 20 onns la B-Band èsi per Rafael Camartin l'emprima giada ch'el ha dastgà diriger la B-Band da la Brass Band da giuvenils naziunala. Il 2008 è el stà magister da register tar la NJBB e dal 2011-2018 er manader da register da l'Orchester d'instruments a flad da giuvenils naziunal NJBO. Sco dirigent ospitant ha el manà il 2017 la Swiss Army Brass Band ed il 2019 la A-Band da la Brass Band da giuvenils grischuna.

Dapi il 2011 dirigia el la Brass Band Imperial Lenzburg e dapi il 2012 la musica da Schindelegi-Feusisberg. Actualmain lavura el sco pedagog da musica a las scolas da musica Burgdorf e regiun Sursee. El vegn dentant adina puspè dumandà per champs da musica, quai ch'el fa gugent.

Rafael Camartin

Avrir la box Serrar la box

Il musicist e dirigent è da l'annada 1980 e deriva da Breil (Surselva). Il 2006 ha el fatg il diplom of Musician MH/Pedagogy cun il rom principal trumbetta tar Markus Würsch a la scol'auta da musica Lucerna. Il diplom da diriger ha el fatg il 2008 tar Ludwig Wicki a la scol'auta d'art a Berna.

Vitiers ha el fatg curs da maister tar Hans Gansch, Alison Balsom e Jouko Harjanne. El ha approfundà ses studis da direcziun d'orchester a Turitg tar Christof Brunner ed a Berna tar Dominique Roggen.

audio
Rafael Camartin: «Bella situaziun che dus Rumantschs diregian»
ord Artg musical dals 07.09.2022.
laschar ir. Durada: 4 minutas 40 Secundas.

Premiera mundiala

Al concert da la Brass Band da giuvenils naziunala hai quest onn era dà ina premiera mundiala. Ludovic Neurohr, il cumponist dal Vallais, ha survegnì l'incumbensa da cumponer in'ovra per duas Brass Bands. El ha scrit «Becoming Giants», in'ovra en quatter parts (I. DNA, II. Mutation, III. Cell division, IV. Giants).

Ludovic Neurohr ha vulì stgaffir in'ovra ch'è simpla da sunar. Er autras musicas duain pudair sunar l'ovra. Il cuntegn da l'ovra suonda a duas directivas: L'emprima è il svilup dal tun da la Brass Band fin a la fusiun da las duas bands e la segunda è il svilup da musicistas e musicists entras la furmaziun pedagogica.

Il spezial vid l'ovra è che las duas bands èn il medem mument sin tribuna, dentant mintgina sco atgna furmaziun e cun ses dirigent. Sulet il register da la percussiun po vesair omadus dirigents.

  • I. DNA suna la B-Band suletta. Il tun classic d'ina Brass Band vegn udida da la B-Band. Il musicist è in noviz e cumenza sia furmaziun musicala.
  • II. Mutation suna la A-Band suletta. L'ensemble absolva intginas mutaziuns, ins senta ina mutaziun da l'atmosfera, il musicist sa sviluppa.
  • III. Cell division sunan las duas bands ensemen. I dat in nov tun entras la fusiun dals dus ensembles. Il musicist vegn or da la crosa e mussa novas abilitads sin ses instrument.
  • IV. Giant vegn er sunada da las duas bands. Il nov tun vegn udì cumplain e cun tut sia forza. La mutaziun è terminada. Il scolar daventa maister e tutga als novs gigants.

La sfida per ils dirigents è da diriger «sincron» e da savair tgenin dals dus dirigents che maina il mument.

RTR Artg musical 15:00

Artitgels legids il pli savens

Scrollar a sanestra Scrollar a dretga