L’onn 2022 ha la pianista Kathrin Schmidlin registrà in disc cumpact cun il titel «Opus 1 Feminin» ed il titel è program. Sin il portatun datti exclusivamain las emprimas ovras, ils opus 1, da cumponistas internaziunalas sco Clara Schumann (nata Wieck), Luise Adolpha Le Beau, Mathilde Berendsen-Nathan, Maria Parczewska-Mackiewicz, Cécile Chaminade, Alicia Terzan e Hilda Kocher-Klein.
Entant ch'i dat da bunamain tut ils cumponists cumprovas da lur ovras scrittas avant lur opus 1, e per part era perscrutaziuns precisas, na vala quai betg per las dunnas. Almain pon ins mussar si che Clara Schumann-Wieck ha gia scrit ovras cun variaziuns avant ses opus 1 las «Quatre Polonaise». Ella è ozendi probabel la cumponista la pli prominenta. Nairas uras da midar quai.
Kathrin Schmidlin
La giuvna pianista da Turitg (annada 1990) ha studegià clavazin tar Karl-Andreas Kolly (Scol'auta d'art a Turitg), Wolfgang Manz (Scol'auta per musica a Nürnberg) e tar Tobias Schabenberger (Scol'auta per musica a Basilea). Schmidlin ha gia gudagnà premis a diversas concurrenzas naziunalas ed internaziunalas. Ella è sa spezialisada sin la preschentaziun d'ovras da cumponistas strusch enconuschentas. Il 2017 ha ella per exempel manà si l'entir ciclus da clavazin «Das Jahr» da Fanny Hensel. Per il 200avel anniversari da Clara Schumann (il 2019) ha ella pliras giadas pudì sa preschentar sco solista en il concert per clavazin a-mol. Dapi il 2018 instruescha ella ina classa da clavazin al conservatori da Turitg.
paginas d'internet
Pierre Wissmer
Dal tut na desistin nus betg dals umens en l'emissiun. Il cumponist svizzer Pierre Wissmer è naschì il 1915 a Genevra. Davent dal 1958 aveva el er il dretg da burgais da la Frantscha. El ha studegià clavazin, teoria e cumposiziun al conservatori da Genevra, contrapunct a la Schola Cantorum e diriger a l'Ecole Normale de Musique a Paris. Gia baud ha el emprendì d'enconuscher la musica dad Igor Strawinsky, Ernest Bloch, Emile Jaques-Dalcroze e Frank Martin. Emprimas cumposiziuns da Wissmer cumparan ils onns 1930. Sias ovras èn polifonas ed han in'instrumentaziun raffinada. El è stà professer per cumposiziun al conservatori da Genevra, directur da la Scola Cantorum a Paris e directur da l'Ecole nationale de musique a Le Mans. Il 1983 ha el survegnì il Grand Prix Musical da la citad da Genevra. Pierre Wissmer è mort il 1992 a Valcros (Provence).
En l'Artg musical purtain si'ovra «L'enfant et la rose», introducziun e 12 variaziuns davart l'istorgia «Le Petit Prince» d'Antoine de Saint-Exupéry.
Playfestas: Tavau 1997
En la segunda ura Artg musical datti puspè ina giada in sguard en il passà da las festas registradas da RTR. Questa giada datti insaquantas producziuns da societads da musica a la Festa chantunala da musica il 1997 a Tavau. Igl è ina da las 23 festas chantunalas e districtualas ch'èn gia publitgadas sin noss portal Playfestas. Il portal è in grondius passatemps per tadlar chant e musica a festas u era a concerts. I vala la paina da fufragnar ina giada sin questa pagina e prender in'ureglia plaina da nossas musicas e noss chors.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.