La chantadura da jazz Sarah Vaughan ha concertà cun grondas bands avant ch'ella è daventada solista. Enconuschenta è ella cun sias chanzuns «Send in the clowns» e «Broken-Hearted Melody». Sarah Vaughan è s’interessada gia da pitschna per la musica ed esser sin il palc. Cun la victoria d'ina concurrenza da talents che ha gì lieu en il teater «Apollo» a Harlem ha ella lantschà sia carriera da chantadura. Ella ha lavurà ensemen cun bandleaders sco Earl Hines e Billy Eckstine avant ch'ella è daventada interpreta da solo. Ils 3 d'avrigl 1990 è Vaughan morta en la vegliadetgna da 66 onns a Hidden Hills en la California.
Sarah Lois Vaughan è naschida ils 27 da mars 1924 a Newark/New Jersey. Ses bab era scrinari, sia mamma lavunza – però tuts dus amavan er la musica. La giuvna Vaughan ha studegià clavazin ed orgla, e sia vusch era d'udir en la baselgia dals baptists da Mount Zion.
Las emprimas experientschas da chantadura ha ella fatg en ina concurrenza da talents che ha gì lieu en il Teater «Apollo» a Harlem, nua che bleras legendas musicalas americanas avevan cumenzà cun lur carriera. Suenter ch'ella aveva ristgà da sa participar ha ella gudagnà il 1942 la concurrenza cun sia chanzun «Body and soul». Ella ha tschiffà l'attenziun d'in auter vocalist, numnadamain da Billy Eckstine, che ha persvas Earl Hines d'engaschar Vaughan per chantar cun ses orchester.
Chanzuns e carriera
Il 1944 ha Vaughan bandunà Hines per entrar en la nova band dad Eckstine. Cun Eckstine sunavan er il trumbettist Dizzy Gillespie ed il saxofonist Charlie Parker, dus dals piuniers da la nova furma da jazz che è vegnida enconuschenta sco bebop.
Suenter esser stada in onn tar l'orchester d'Eckstine ha Vaughan lavurà curtamain cun John Kirby avant che daventar solista. Suenter ch'ins aveva gia dà ad ella il surnum «Sassy» avevan ins remartgà ch'ella vegniva titulada d'in DJ a Chicago sco «The Divine One».
Il proxim decenni ha Vaughan producì dapli musica da pop tar la gronda chasa discografica Mercury Record. Ella ha però er registrà chanzuns da jazz sin in label subsidiar, numnadamain EmArcy. Ella ha chantà hits sco «Whatever Lola Wants» (1955), «Misty» (1957) e «Broken-Hearted Melody» (1959). Vaughan ha fatg concerts en ils Stadis Unids ed en l'Europa, uschia er il 1967 a Helsiniki cun il Bob James Trio, il concert che nus udin oz.
Carriera tardiva
Suenter ils onns 1950 è sa midà il gust musical dal grond public e la carriera da Sarah Vaughan è vegnida interrutta. Ella è però restada ina interpreta populara, surtut cura ch'ella chantava live. Ses public era fascinà da sia vusch loma ed intensiva, ses chant e ses tuns emoziunals.
Tar las registraziuns che Vaughan ha fatg pli tard tutgan interpretaziuns da chanzuns dals Beatles e musica brasiliana. En il decurs dals onns ha ella lavurà ensemen cun persunas sco il producent Quincy Jones, il pianist Oscar Peterson ed il dirigent Michael Tilson Thomas. Vaughan ha survegnì ses emprim Grammy grazia a sia lavur cun Thomas e la filarmonia da Los Angeles en il «Gershwin Live!» (1982).
Mort e relasch
Il concert final ha ella dà 1989 en il Blue Note Club da New York. Ella è morta ils 3 d'avrigl 1990 cun 66 onns a Hidden Hills, in quartier da citad da Los Angeles en California. Ella è stada maridada e divorziada 4 giadas ed aveva ina figlia adoptada.
Il concert dal festival da jazz a Helsinki, 1967: Sarah Vaughan , chant / Bob James , piano / Herb Mickman , bass / Omar Clay , battaria
