Georg Friedrich Händel ha scrit ses «Oratorio per la resurrettione di Nostro Signor Giesù Cristo» (oratori per la levada da Niessegner Jesus Cristus) il 1708 durant ses temp a Roma. Il libretto è da Carlo Sigismondo Capece. La primaudiziun cun in grond orchester sut la direcziun da Arcangelo Correlli è stada la dumengia da Pasca l'onn 1708 a Roma en il Palazzo Bonelli, il palaz dal fautur da Händel, Marchese Francesco Maria Ruspoli.
La cumposiziun
«La Resurrezione» vala sco ovra da l’emprima perioda dal giuven cumponist ch'aveva lura 23 onns. Cun sias scenas ed ils caracters da las persunas è l'ovra datiers a l’opera taliana. Il chant virtuos da Lucifer regorda als demunis da l’opera veneziana e las arias da Maddalena èn uschè plain expressiun ch'Händel ha surpiglià ina da questas pli tard en si’opera «Agrippina». En l entir oratori datti be duas scenas cun chor, mintgamai la fin da las duas parts. Persuenter datti en tut 20 arias, uschia che l’ovra è propi pli datiers d'in’opera che d’in oratori sco quai che nus enconuschain oz.
Cuntegn
En l’emprima part da l' oratori sa mesiran il giavel (Lucifer) e l'anghel (Angelo) la notg da sonda sin dumengia da Pasca davart l’avegnir suenter la crucificaziun e mort da Jesus Cristus. La segunda part stat en l'ensaina dal sulegl che leva, da la glisch divina e da la levada da Jesus che vegn annunziada cun in terratrembel.
L'Artg porta ina registraziun directa dal concert da l'orchester «I Barocchisti» e dal Coro della Radiotelevisione Svizzera Italiana sut la direcziun da Diego Fasolis. Las solistas ed ils solists èn:
- Roberta Invernizzi sco Maddalena, sopran
- Alice Borciani sco Angelo, sopran
- Marina De Liso sco Cleofe, mezzosopran
- Luca Cervoni sco son Gion, tenor
- Luigi De Donato sco Lucifer, bassbariton
RSI ha fatg la registraziun l'onn 2016 en l' Auditorio Stelio Molo a Lugano.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.