Dapi decennis è mintgamai la segunda dumengia dal mais matg deditgada a las mammas. Per blers è il di da las mammas in di da festa per engraziar a lur mamma per tut quai ch'ella ha fatg e fa per ses uffants e la famiglia. Er en il mund da la musica han bleras cumponistas e blers cumponists laschà inspirar da la mamma per scriver tocs musicals, chanzuns, ovras pli grondas u er pli pitschnas. L'emissiun porta intginas chanzuns da cumponists rumantschs sco Alvin Muoth, Gion Duno Simeon, Flavio Bundi, Mario Pacchioli u er da Gion Andrea Casanova.
Plaz hai dentant er per cumposiziuns ord il mund da la musica d'orchester sco era ord il mund da la musica populara.
Matg – il mais da Nossadunna
Er ils chants per Maria, la mamma da Dieu, Nossadunna, èn numerus en il mund da la musica. Il mais matg è en la Baselgia catolica il mais da Nossadunna. Dapi il concil d'Efesus l'onn 431 ha Maria, la mamma da Jesus, ina rolla nobla ed extraordinaria en il cristianissem e la veneraziun per ella è senza cunfins. Durant in onn datti passa 30 dis da festa e da commemoraziun per Maria. I na fa perquai betg smirvegliar ch'era blers cumponists han deditgà chanzuns a Maria, Ave Maria's.
En l'emissiun datti sper il renumà Ave Maria da Franz Schubert er Ave Maria's da Johannes Brahms, Giuseppe Verdi, Anton Bruckner ed auters er talas chanzuns da cumponists rumantschs sco Gion Giusep Derungs, Carli Scherrer, Conrad Bertogg u Alfred Oswald.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.