Igl è in spectacul unic nua che set furmaziuns svizras sa preschentan, tranter auter er il Top Secret Drum Corps da Basilea, Majesticks u er il Trio Anderscht. Dal marimba fin il schumber, dal arpret fin ritmus impressiunants che vegnan dads sin sadellas da rument – la gala dilucidescha las bleras fassettas da la percussiun en in spectacul explosiv.
A chaschun dal Percussions Festival International (dals 17. – 19.06.2022) ha RTS envidà las diversas furmaziuns per dar communablamain in concert da gala en l'Opéra de Lausanne. E las furmaziuns han persvadì il public cun grondiusas shows, plain energia, ritmus ed era ina presa umor.
L' Artg musical emetta la gala en in'emissiun da duas uras.
Intginas furmaziuns èn gia enconuschentas dapi intgins onns, sco per exempel il Top Secret Drum Corps u Stickstoff ch'è er gia sa participà tar l'emissiun da televisiun «Supertalent» da RTL. In dals commembers da Stickstoff è in Grischun, Tamino Weggler. El ha raquintà in zic da questa furmaziun.
Sper ils instruments da ritmus tradiziunals (schumber, pauca, tschinella) tutgan a la percussiun er instruments sco marimbaphon, vibraphon ed arpret. Sin tribuna a Losanna hai dentant er dà instruments nunusitads sco per exempel il «rimbatune» (creà ord bischens da PVC), chantas da latg sco battaria u er sadellas da rument. E las interpretas ed ils interprets han celebrà cun grond gust e plaschair lur preschentaziuns.
Las furmaziuns en la rait
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.