Il «Trio Räss» - tgi è quai?
Il «Trio Räss» cun Erich Fischer al vibrafon, Hannes Giger al cuntrabass e Belisa Mang da la Baviera a l’arpret è ina furmaziun dal chantun Argovia. Els èn sa scuntrads il 2002 durant l’Expo mundiala a Hannover cun far musica en il pavigliun svizzer. Il «Trio Räss» sa serva dal grond fundus da la musica populara svizra e bavaraisa. Schottischs, polcas ed anc blers auters sauts populars enritgeschan els cun improvisaziuns ed arranschaments unics ed originals. En il rom dal «Festival da folk da la EBU» han els procurà per tuns e suns nunusitads plain temperament e schlantsch.
Il spiert che regna ad in festival è simplamain genial – tut auter che ad in concert!
Inscunter da tuns populars a Rudolfstadt
Il festival da folk da l'EBU è in eveniment da tradiziun cun musicistas e musicists che vegnan da tut l’Europa e che cultiveschan ils pli differents stils populars. Quest festival vegn organisà gia per la 41avla giada. Era quest onn è el stà part dal festival da musica da Rudolfstadt en Germania. 21 furmaziuns da la Scandinavia fin en Spagna èn sa participads a l’occurenza.
