Mintga set-otg onns realisescha il Chor viril Surses in project pli grond e pretensius. Uschia è er l’idea da las «Rieischs surmiranas» naschida. L’ovra duai en emprima lingia preschentar al public la musica, las valurs e la cultura rumantscha, en spezial la surmirana.
L’idea è da laschar resunar veglias chanzuns rumantschas surmiranas en in nov vestgì sinfonic. Uschia ha il Chor viril Surses e ses dirigent Rainer Held surdà l’incarica al cumponist Philip Henzi d’orchestrar set chanzuns tradiziunalas rumantschas e trais cumposiziuns novas ad in'ovra gronda. Scrit las trais novas chanzuns han Nina Mayer («Igl Novrivo»), Flavio Bundi («Tign e retign») e Mario Pacchioli («An muvimaint»). Ils texts per lur chanzuns han els prendì da la trilogia poetica da la giuvna autura surmirana Dominique Caglia-Dosch.
Ordlonder hai dà ina grondiusa ovra ch’il Chor viril Surses, la Kammerphilharmonie Graubünden ed il solist Flurin Caduff han pudì preschentar il mars 2023 a Savognin (halla Uffer), Cuira (Baselgia son Martin) e Berna (Baselgia franzosa).
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.