Bain Sonzowka en il district Jekaterinoslaw da l'imperi russ. Oz: Oblast Donezk, Ucraina. Ils 23 d'avrigl 1891 nascha qua Sergei Prokofjew, sper Schostakowitsch e Strawinsky il pli enconuschent ed impurtant cumponist russ-sovietic dal 20avel tschientaner. Gia baud è sa mussà ses talent musical. Durant ses temp da studi en il conservatori a St. Petersburg vala el sco giuven selvadi, sco «enfant terrible» en la scena da musica russa. Emprimas ovras sco «Skythische Suite», l'opera «Der Spieler» u las «Visions fugitives» mussan ses scheni original, che ha emprendì la basa cumpositorica da standard e che nizzegia quella a moda virtuosa per atgnas ideas musicalas. Vitiers era Prokofjew in pianist da vaglia, quai ch'era sias cumposiziuns per clavazin cumprovan.
Cumià e return
Sergei Prokofjew ha 26 onns cura che la Revoluziun d'october rumpa ora a St. Petersburg. Cun quella sa midan las relaziuns politicas en la Russia radicalmain, da l'imperi russ sut il zar a l'Uniun sovietica communista. Il 1918 banduna el l'Uniun sovietica en direcziun dals Stadis Unids. Là n'ha el dentant betg pudì fitgar pe, ed è lura sa chasà il 1920 a Paris. Il 1927 è el per l'emprima giada puspè viagià en l'Uniun sovietica a chaschun d'ina turnea da concerts. Davent da quest mument ha el adina pli fitg ponderà da returnar en sia patria. Il 1936 ha el puspè prendì definitivamain domicil a Moscau. Il 1938 è el stà l'ultima giada en il vest. En l'Uniun sovietica ha el gì ina fasa fitg productiva e bleras da sias ovras impurtantas èn naschidas là. Il 1945 è el cupitgà fermamain ed ha gì ina ferma squassada dal tscharvè che ha flaivlentà sia sanadad.
Il 1948 ha il biro da cultura da la UdSSR decretà in conclus co la musica classica haja da tunar, per ch'ella gidia a l'ideologia e propaganda sovietica. I ha dà in process inscenà public cunter Prokofjew, Schostakowitsch, Chatschaturjan ed auters. Quest process ha tutgà fermamain Prokofjew. Sia sanadad era gia flaivla suenter sia greva cupitgada. Quai ch'el cumpona en ses ultims onns da vita (p. ex. la sinfonia nr. 7 u il ballet «Märchen von der steinernen Blume») è segnà d'ina miaivladad da vegliadetgna e resignaziun. Tuttina scriva el er a la fin da sia vita anc gronda musica.
La fin
Ils 5 da mars 1953 è in di istoric en l'istorgia sovietic-russa. Josef Stalin mora. A Moscau ed en l'entira Uniun sovietica regia durant dis ina situaziun excepziunala. Nunobservà da la publicitad ed en la sumbriva d'in spectacul da cumià gigantic enturn in dals pli crudaivels dictaturs da l'istorgia mundiala – mora ils 5 da mars e bunamain a las medemas uras anc in burgais sovietic: il cumponist Sergei Prokofjew. Tenor rapports n'haja gnanc dà fluras sin sia fossa.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
