Mintga commember da giuria po reparter maximalmain 60 puncts. Ils pli paucs ed ils pli blers puncts vegnan stritgads uschia ch’i dat in maximum da 180 puncts pussaivels per mintga toc (pensum e patg), pia 360 en total. Cun 342 puncts ha la Brassband Berneroberland cun ses dirigent rumantsch Corsin Tuor survegnì ils pli blers puncts en total. La band n'ha però betg fatg ils pli blers puncts en il toc da pensum ed er betg en il toc da patg, ha dentant mussà la prestaziun la pli solida e guliva cun duas giadas 171 puncts ed uschia gudagnà meritadamain.
La successiun da la represchentaziun sin tribuna vegn tratg ora. Las emprimas bands che sunan l'avantmezdi il toc da pensum sunan lura il suentermezdi pir pli tard il toc da patg.
En l'emissiun «L'Instrumentala» da mesemna ils 28 da settember 2022 hai jau gia preschentà il grond victur sco era las autras bands sin il podest. Sin plaz dus è la Brass Band 13 Étoiles dal Vallais cun 340 puncts e sin plazza trais la Brass Band Luzern Land cun 339 puncts.
Rangaziun
Ils pli blers puncts per il toc da pensum ha recaltgà l'Oberaargauer Brass Band cun ses dirigent Patrick Ottiger. Per lur interpretaziun da l’ovra «The Other Side Of Silence For Brass Band» da Stephen Roberts han els survegnì 173 puncts. Il premi spezial per avair sunà il meglier toc da patg va a la Brass Band 13 Étoiles e ses dirigent Frédéric Théodoloz. Per lur interpretaziun dal toc «Till Eulenspiegels lustige Streiche» ha la giuria dà 178 puncts.
Wallberg Band
Ina furmaziun speziala ed extraordinaria è la Wallberg Band. Igl è ina furmaziun cun musicantas e musicants or da l’entira Europa (era Svizra e Grischun) che vegnan mintgamai ensemen in'emna avant il Swiss Open Contest. Durant be paucs dis treneschan els lura intensiv ils dus tocs. Pervi da la pandemia da corona èn els stads l'ultima giada il 2019 al al Swiss Open.
Cun grond plaschair è la Wallberg Band perquai sa participada quest onn puspè a la concurrenza ch'ella ha terminà sin plazza set cun 331 puncts, be 9 puncts damain che la furmaziun victura.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.