Il 2023 va ina èra a fin. Il Calamus ha realisà sia ultima turnea da concerts, la 40avla. Cun excepziun da l'emprima turnea (l'enviern 1984) ha il trio durant quatter decennis dà mintgamai ina turnea da concerts la stad la fin da fanadur, entschatta avust. Sapientivamain ha il trio dà quests concerts en pitschnas baselgias grischunas sco per exempel a Wiesen, Versomi, Luzein, Veulden, Andeer, Lai u Mistail (Alvaschagn). Ils ultims onns eran quai adina nov concerts e l'ultim per regla a Cuira, en la baselgia (gronda) son Martin. RTR ha registrà il concert dals 28 da fanadur 2023 a Lai, en la baselgia refurmada (Bergkirchlein). Igl è stà il penultim concert da l'ultima turnea da stad.
Entschatta
Il 1984 han Josias Just, Martin Zimmermann e Martin Imfeld fundà il Calamus Trio, in trio da clarinettas. L'intent primar era da derasar cun ils concerts la musica scritta per clarinettas e corns da basset. Ils emprims concerts han els dà l'enviern en las baselgias a Wiesen, Seewis, Andeer e Veulden. Cunquai che las temperaturas n'eran l'enviern betg uschè bunas per lur instruments han els trais decidì da far ils concerts la stad. 20 onns han els fatg questas turneas da stad e lura il schoc. L'avrigl 2004 è Martin Imfeld mort andetgamain cun be 54 onns. Enstagl da far la turnea da giubileum (20 onns) hai perquai dà la stad 2004 ina turnea da trais concerts en memoria da Martin Imfeld.
Josias Just e Martin Zimmermann èn stads conscients ch'i n'è betg pussaivel da remplazzar Martin Imfeld, i na fiss betg pli stà il medem. Uschia èn els sa decidids da restar in trio e prender vitiers in clavazin, quai ch'ha avert novas pussaivladads per lur repertori. Els han dumandà la pianista Alena Cherny che Josias Just enconuscheva gia. L'Ucranaisa ha dà tiers ed è gia dapi 20 onns da la partida e persvada cun sia virtuositad e ses grond dun d'accumpagnar.
Per lur ultima turnea da concert han els danovamain elegì ivettas or dal mund da la musica da chombra.
Fin
Cun sunar l'ultima turnea da concerts da stad vul il Calamus Trio era plaunsieu dar adia a ses public e chalar cun sias activitads. Sco quai che Josias Just ha ditg envers RTR sajan planisads per l'onn 2024 anc dus concerts da cumià la fin da matg, in a Maiavilla ed in a Cuira. Lura saja il trio istorgia ed ils trais commembers van mintgin atgnas vias musicalas.
Durant quests 40 onns han els sunà radund 400 concerts ed er edì inqual disc cumpact cun musica da chombra per clarinettas, corns da basset e clavazin. Els han sunà ovras originalas per questa furmaziun, transcripziuns ed era cumposiziuns ch'els han dà l'incumbensa a Gion Antoni Derungs, Gion Giusep Derungs u Iso Albin. Uschia ha il Calamus Trio avert ad in public interessà ina vasta invista en musica pli pauc enconuschenta.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
