Per ses giubileum da 30 onns sin tribuna ha la chantadura grischuna Maria Riccarda Wesseling purtà a Beat Sieber (manader artistic da la Kammerphilharmonie Graubünden) l'idea da metter il focus d'in concert sin la rolla da la mamma en las operas e betg adina sin ils pèrs d'amur. Sieber è stà fascinà da l'idea e bainspert han ins mess en pe il project e realisà ina retscha da concerts sut il motto «Viva la mamma – mothers in opera».
Ils concerts èn stads ad Arosa, Cuira, Flem, Glion e Scuol ed en il cudeschet da program datti er ina interessanta recensiun da Laura Decurtins davart las dunnas en l'opera.
Viva la mamma
Sco arranschader per il concert han ins pladì Andreas N. Tarkmann, actualmain in dals enconuschents arranschaders per orchester. Il cumponist tudestg che viva a Stuttgart e Maria Riccarda Wesseling han tschertgà e la finala elegì las arias giavischadas. Tarkmann ha lura arranschà questas chanzuns per la filarmonica da chombra e fatg ordlunder in ciclus d'ovras enconuschentas ord operas per mezzosopran ed orchester. Tranter auter la scena da la conta ord «Pique Dame», l'aria da la marquise ord «La fille du régiment», la scena da Klytemnästra ord «Elektra» u l'aria da Azucena ord «Il trovatore».
