La fin d'emna passada è stà per l'emprima giada en il KKL a Lucerna la concurrenza naziunala da brassband. Quai pervi da lavurs da renovaziun en l'Auditorium Stravinsky a Montreux nua che la concurrenza ha per il solit lieu. Las meglras furmaziuns da sturs or da l'entira Svizra èn sa mesiradas en las differentas categorias. Passa 60 furmaziuns han piglià part, dal Grischun trais: GR Brass (elita), BB Cazis (1.cat.), e la Musikgesellschaft Jenaz (3. cat.).
Cazas dumogna la promoziun
Grazia ad ina producziun persvadenta dal toc da pensum «Sinfonietta Nr. 3» da Etienne Creusaz po la BB Cazis sunar l'onn proxim en la segund'auta categoria, elita. Cazas ha survegnì 94 puncts (da 100) e fatg il segund plaz. Meglra era sulet la Brass Band Treize Étoile – furmaziun B. Uschia èsi grategià al giuven dirigent Robin Bartholini da far quest pass gia en ses emprim onn ch'el diregia la furmaziun.
GR Brass franca sia posiziun
Sut la direcziun da Gian Stecher ha la GR Brass pudì francar sia posiziun en la categoria elita. Ella è vegnida tschintgavla ed ha survegnì 92 puncts per sia preschentaziun dal toc da pensum «Blue Horizons» da Bertrand Moren. Gudagnà en questa categoria ha l'Ensemble de cuivre Euphonia (FR) cun 98 puncts.
Er la musica da Jenaz è sa participada quest onn a la concurrenza naziunala. En la terza categoria ha la musica cuntanschì 86 puncts. Il dirigent Tristan Uth ha gì da preparar Jenaz cun il toc da pensum «Focus» da Fritz Voegelin. Gudagnà en questa categoria ha la Musikgesellschaft Mühlau (AG) cun 94 puncts.
Puspè Treize Étoile
En la pli auta categoria ha danovamain la Brass Band Treize Étoile gudagnà, avant la Brassband Bürgermusik Luzern. Cunquai che la Treize Étoile è campiunessa europeica po er la BML sa participar a la concurrenza europeica il 2024 en la Lituania.
L’emissiun preschenta furmaziuns da brass, armonias, fanfaras, musicas militaras, furmaziuns pitschnas ed auter pli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.