Siglir tar il cuntegn

Header

video
Di da la musica svizra tar RTR
Or da Telesguard dals 16.09.2022.
laschar ir. Durada: 1 minuta 5 Secundas.
cuntegn

Di da la musica svizra tar RTR 6 concerts LIVE per Vus

La lavur da musicistas e musicists svizzers e cunquai la diversitad musicala è stada ils 16 da settember en il center da tuts emetturs da la SRG. Perquai è vegnì emess durant 24 uras be emess musica indigena.

Tar RTR hai tranter auter dà sis concerts LIVE or da la Lounge.

Il program dal di da la musica svizra

Avrir la box Serrar la box
  • 8:00 «Kaufmann» live
  • 9:00 «Carmen Cresta» live
  • 10:00 «Marie Louise Werth» live
  • 11:30 «Gina & Jamira Estrada» live
  • 13:00 «Julie Fox» live
  • 16:00 «Happy, for real» live
  • 20:00 Concerts da l'Open Air Chapella 2022 (Oak Street e James Gruntz)
  • 21:00 Concerts da l'Open Air Lumnezia 2022 (Mattiu e We Are Ava)

Kaufmann

2018 ha la gruppa «Kaufmann» publitgà lur album da debut «König vu dr Nacht» ed uschia fatg il pass da la stanza d’emprova sin las tribunas. Bun 100 concerts pli tard, l’onn 2019, han els gia publitgà in ulteriur album pitschen «Dr Chüalschrank isch leer». Dapi lura han els pudì sunar sin diversas tribunas grondas sco per exempel a l’Open Air Sogn Gagl ubain a Locarno durant il Moon and Stars. Lur grond hit «Lisa» ha anc bain inqual en l’ureglia. Per il 2022 han ils musicists planisà da publitgar pliras singles dublas ensemen cun differentas gruppas svizras.

audio
Di da la musica svizra: discurs cun Reto Kaufmann
ord RTR Audio dals 16.09.2022.
laschar ir. Durada: 5 minutas 52 Secundas.

Carmen Cresta

La chantadura Carmen Cresta numna ses stil da musica «Blues Grischun». Quai munta Blues, Bluesrock e Rock chantà en il dialect grischun. Quel è sia lingua preferida er sch’ella ha era publitgà pliras chanzuns rumantschas. Be in onn suenter «Kaufmann» ha la dunna da la Val d’Alvra publitgà ses album da debut «Aurora». La rutina dal mintgadi, il rumper ora da quella e l’amur èn da lezzas uras stadas ils temas principals. Dapi lura è ella s'etablida sco artista live ch'ha en il trantertemp publitgà dapli musica dentant era barattà sia band.

video
In portrait da Carmen Cresta
Or da Telesguard dals 16.09.2022.
laschar ir. Durada: 3 minutas 9 Secundas.
audio
Di da la musica svizra: discurs cun Carmen Cresta
ord RTR Audio dals 16.09.2022.
laschar ir. Durada: 4 minutas 49 Secundas.

Marie Louise Werth

Passa 30 onns èn las tribunas e la musica il dachasa da Marie Louise Werth da Mustèr. Sco chantadura dals «Furbaz» ha ella gì grond success – in highlight è franc stà la participaziun a l’Eurovision Song Contest 1989. Cun «Viver senza tei» han els preschentà per l’emprima – e fin uss ultima giada – ina chanzun rumantscha a la concurrenza europeica. Dentant er sco artista da solo ha ella cuntanschì renum en Svizra. Il 2018 ha ella publitgà l’album «A Breeze of Emotions» ed il 2020 in album da Nadal cun il titel «Magia d’amur».

audio
Di da la musica svizra: discurs cun Marie Louise Werth
ord RTR Audio dals 16.09.2022.
laschar ir. Durada: 12 minutas 8 Secundas.

Gina & Jamira Estrada

La famiglia Estrada ha la musica electronica en il sang. Gina, la mamma, ch’è possessura da la stizun Etniko a Cuera e che maina il local da cultura Cuadro22 fa actualmain musica da Trip-Hop. Pli baud ha ella chantà tar «Mo’Shiba» ubain «Mokka» cun ses um Jamiro «Titi» sco DJ. La figlia Jamira è suandada lur exempel ed è sa profilada sco djane en ils clubs svizzers. Per il success stgava la giuvna musicista gugent en archivs e stizuns da plattas per scuvrir musica extraordinaria ch’ella sa lura integrar en ses sets.

video
Di da la musica svizra – Gina & Jamira Estrada
Or da Musica dals 22.09.2022.
laschar ir. Durada: 8 minutas 20 Secundas.
audio
Di da la musica svizra: discurs cun Gina e Jamira Estrada
ord RTR Audio dals 16.09.2022.
laschar ir. Durada: 8 minutas 1 Secunda.

Julie Fox

Ella è creschida si cun musica irlandaisa, chansons franzos e chantauturs talians – da questas influenzas resulta ses stil da folk. Julie Fox ch’è naschida en il Tessin ha sco giuvna cumenzà a scriver poesias. Ella scriva da diversas scuntradas, da viadis e da ses mintgadi. Pir pli tard èn las melodias vegnidas tiers. L’atun 2021 ha ella lura publitgà in pitschen album. Sia plurilinguitad ha ella demussà cun la single actuala «O la Mer».

audio
Di da la musica svizra: discurs cun Julie Fox
ord RTR Audio dals 16.09.2022.
laschar ir. Durada: 4 minutas 25 Secundas.

Happy, for real

La pli giuvna furmaziun durant il di da la musica svizra è «Happy, for real» da Cuira. Il duo che sa cumpona d’Olivia Virgolin (Anatina, Biba, Modest Wealth) ed il producent e musicist Marcus Petendi (Calandaboi, Polyphone) han pir avant curt publitgà lur emprimas singles. Lur debut sin tribuna han els dà entschatta settember a l’Arcas Rock a Cuira. Els fan musica moderna da pop cun ghitarras siemiusas ed ina buna purziun synthesizers.

audio
Di da la musica svizar: discurs cun Olivia Virgolin e Marcus Petendi
ord RTR Audio dals 16.09.2022.
laschar ir. Durada: 4 minutas 55 Secundas.

La cumpart da la musica svizra

Schebain pop, rock, musica populara, jazz, opera, chant da chors ubain musica classica: Musica svizra da tuts geners vegnan emess sin ils emetturs da la SRG ed han uschia ina gronda muntada. La cumpart da la musica svizra è tar tut ils emetturs gronda. Tar RTR munta quai sur l’entir onn bun 50%. Cun il di da la musica svizra vulan ils emetturs porscher ina tribuna a la musica varianta, da tuttas linguas e da tut ils geners per uschia anc ina giada far attent sin noss prezius stgazi musical.

Ghitarra cun statistica
Legenda: Cumpart da la musica svizra durant l'entir onn tar RTR. RTR
audio
Di da la musica svizra: quai spetga nus
ord Actualitad dals 16.09.2022.
laschar ir. Durada: 5 minutas 38 Secundas.

RTR Musica 08:00

Artitgels legids il pli savens