Da bleras melodias enconuschentas datti versiuns alternativas, reprisas e covers – uschia er dal imni, il psalm svizzer. Quel è vegni cumponì da Alberich Zwyssig, in pader cisterziens ch’ha vivì dal 1808 fin il 1854. La melodia originala era l’emprim in chant da messa. Il 1841 piglia Zwyssig in text dal poet turitgais Leonhard Widmer per cumplettar sia chanzun. Quella è dapi il 1961 l’imni uffizial da noss pajais.
Il psalm svizzer per tut ils gusts
Sper la versiun classica ed originala sunada da la musica da l'armada svizra, datti er bleras autras versiuns en differents stils – schizunt en versiuns da tecno, rave e dixie. Ina bella versiun populara suna la chapella da Dani Häusler, quella en stil dixie deriva da la band da Basilea Storyville Weepers, e per ils fans da tecno e rave datti las versiuns da Tomcat (Hymn) e dal Fair Sinfonie Orchester (Hymne suisse).
Cun ghitarra electrica e da chor viril
Cler ch'i dat er la versiun da rock da l'imni svizzer, per exempel ina da Gotthard, La versiun dal duo AlpPan cuntegn tuns da flauta da pan e da tiba. Ina versiun divertenta han registrà ils Minstrels dal 1971, duvrond il text da lur semperverds «Grüezi wohl Frau Stirnimaa». Ed ina da las bellas versiuns rumantscha chanta il Chor viril Ligia Grischa.
