Gion Casutt è naschì il 1. da december 1935 – e l'onn 1952 ha el cumenzà cun 17 onns a sunar en la Societad da musica Falera, ed il medem onn er cumenzà a chantar en il Chor viril da Falera. En la musica ha el chalà da sunar suenter 30 onns – e da Nadal 2025, cun 90 onns, ha el chantà l'ultima giada cun il chor viril. Chantar 74 onns en in chor è ina prestaziun extraordinaria e remartgabla. Er sunar e chantar il medem temp na fan betg blers. En la famiglia Casutt da Falera para dentant gist quest engaschi dad esser francà en il sang. Er duas da las biadias, Nadine Wellinger-Simonet e Viviane Wellinger, chantan e sunan. Sco quai ch'ellas han tradì en in discurs va quai bain in sper l'auter, e senza musica fiss la vita bler pli lungurusa e trista.
En l'Artg musical raquintan il tat Gion sco era las biadias Nadine e Viviane da lur motivaziun, engaschi e plaschair da far musica.
Cun chantar passa set decennis en in chor datti natiralmain era bleras anecdotas e regurdientschas. Era en l'archiv dad RTR sa chatta ina tala regurdientscha. Il settember 1993 ha la Televisiun rumantscha numnadamain fatg l'emissiun «Direct da Falera» – ed en quella ha era Gion Casutt chantà cun il Chor viril Falera.
Ultimas festas da chant da Gion Casutt cun il Chor viril baselgia Falera
La festa federala da chant a Gossau 2022
La festa districtuala da chant a Trun 2024
