Da venderdi fin dumengia ha la Festa federala da jodladers e jodladras carmalà radund 210’000 amis ed amias dal jodel a Zug. RTR ha dastgà accumpagnar l’Älplerchörli Obervaz durant sa preparar e tar la represchentaziun.
A Zug ha regì quests dis ina tempra da festa populara. Adina puspè hai era gì glieud en costum tradiziunal, e gruppas che chantavan u jodlavan.
En la gronda sala dal Teater Casino a Zug ha l’Älplerchörli Obervaz lura dà lur toc. Quel saja gartegià, han las jodladras ed ils chantadurs ditg suenter la represchentaziun. E la glieud en la sala haja gì plaschair da tadlar, è stada l’impressiun.
E la conferma per il sentiment da las commembras e dals commembers da l’Älplerchörli è suandà la dumengia. Suenter l’act festiv principal dal di ha il comité d'organisaziun da la festa federala communitgà ils resultats. La racolta per il chor dad Obervaz – la meglra nota. Ma la nota saja secundara, han ils ins manegià. Pli bel saja da passentar ensemen il temp da la festa.
La bilantscha da la pli auta jodladra svizra
Karin Niederberger, la presidenta da la Associaziun federala da jodlar è fitg cuntenta cun la 31avla ediziun da la Festa federala da jodlar. Ella n'è betg mo stada a la festa sco «fatscha» da l'associaziun, mabain er per sa preschentar davant public e schuria sco jodladra singula e sco dirigenta dal Club da jodlar Hochwang da Landquart. A nus ha ella raquintà sco ch'ella ha resentì la fin d'emna dals 16 enfin ils 18 da zercladur a Zug.
Fullas nunspetgadas a Zug
Per ils organisaturs da la Festa federala da jodladras èn ils passa 210’000 visitaders e visitadras stadas ina surpraisa. E passa 10’000 activs èn sa mesirads cun jodlar, sunar la tiba e bittar la bandiera. Betg mo uniuns da jodel svizras èn da la partida, er da lunsch derivan ellas: dal Canada, ils Stadis Unids da l'America, il Giapun e da l'Australia.
La 31avla festa è stada da venderdi fin dumengia a Zug, suenter ina pausa da sis onns. La davosa ediziun era crudada ora pervi da la pandemia da corona. La proxima Festa federala da jodladras ha lieu il 2026 a Basilea-Citad.
