Dals 19 als 22 da settember, en in mez onn, è a Crans Montana la 13avla festa federala da la musica populara. Quai vegn ad esser ina fin d’emna cun blera musica, inscunters, festas e tradiziuns cun var 80'000 aspectaturas ed aspectaturs.
Mintga quatter ons
La festa federala da musica populara datti già dapi l’onn 1971 e l’emprima festa è stada a Sargans. Suenter es’i vinavant a Horw, Winterthur, Interlaken, Martigny, Küssnacht, Appenzell, Bulle e Stans. Er en il Grischun hai dà ina da questas festas, il 2011 a Cuira – e l’ultima è stada il 2015 ad Aarau.
Pli che 1300 musicantas e musicants
Tar las ultimas festas èn sa participads sur 1'300 musicantas e musicants cun 650 orgelets, 250 contrabass, 200 clarinettas, 180 accordeons, 48 clavazins e 13 arpets e durant trais dis hai dà atmosfera da festa, concerts ed inscunters cun giuven e vegl e la dumengia anc il cortegi tradiziunal.
Crans Montana 2019
Radiotelevisiun Svizra Rumantscha vegn ad esser preschenta a la 13 avla festa federala da musica populara e dals 19 als 22 da settember rapportain nus da quel eveniment.
