Per arrivar tar las singulas chasinas, per gronda part da crap, han ins da pigliar ina da las numerusas viettas e streglias. Tuttas mainan engiu tar la baselgia dal vitg. Nua ch’ins vesa er l’anteriura chasa da scola ch'è uss la pensiun «Vecchiascuola».
Fabricat pretensius
Sco ch’il possessur da la pensiun, André Platzer ha declerà, saja quai stà in project sur bun dus onns. La gronda part dal material haja gì da vegnir transportà cun helicopter ubain a maun.
Jau hai fatg musculs ils davos mais cun purtar rauba e rauba dal parcadi fin tar noss pitschen paradis.
El che lavura cun in pensum dad 80 % tar l’uffizi da construcziun a Schlarigna ha er duvrà perseveranza ed encletga per la mentalitad taliana. Tut en tut haja la restructuraziun da l’edifizi dentant funcziunà fitg bain.
Il bul da la scola
La chasa che la famiglia Platzer ha cumprà, è stada fin il 1981 en funcziun sco scola elementara per ils uffants da Pianazzola. En las novas localitads da la pensiun chatt'ins er en avegnir regurdientschas dal temp d’uffanza. Mintga stanza è drizzada en tenor in rom da scola. Uschia pon ins durmir en la stanza da biologia, siemiar en quella d’astronomia u er quintar nursas en la stanza da matematica.
Sin l’ultim zac
Ils emprims giasts da la pensiun arrivan en occasiun da la festa da chant si Pianazzola. Tut n’è dentant betg anc pront, uschia ch’ils giasts vegnan a giudair in ensolver tar ina vischina en il vitg. Ch’ins sa gida adina en uschè in pitschen lieu, ha suttastritgà l’Engiadinais.
Restaurant cun vista da panorama
En in mais fa André Platzer quint, ch’il nov restaurant sin il plaunterren da la chasa saja pront. In manader da gestiun ha el entant chattà e las lavurs enturn chasa vegnian ussa fatgas ina suenter l’autra. El e sia dunna n’abitan sez dentant betg en la «Vecchiascuola» sin 650 meters sur mer, mabain a Piuro giun val.
RR actualitad 08:00